މި އަހަރު ބާއްވަން ހަމަޖެހިފައިވާ އައްޑޫ ފުޓްބޯޅަ ޗެމްޕިއަންޝިޕްގައި ބައިވެރިވާން ހުޅުވާލައިފި އެވެ.
ކައުންސިލުން ބުނީ އެޕްރީލް މަހުގެ 26 ގައި ފަށަން ނިންމާފައިވާ މުބާރާތުގައި ބައިވެރިވާން ބޭނުންވާ ބޭނުންވާ ޓީމްތަކަށް މި މަހުގެ 25 އާ ހަމައަށް ހުޅުވާލާފައިވާ ކަމަށެވެ. ކުޅުންތެރިންގެ ލިސްޓު އަންނަ މަހުގެ 25 ގައި ހުށަހަޅަން ޖެހޭ އިރު، ކުޅުންތެރިންނާއި އޮފިޝަލުންގެ ލިސްޓަށް ބަދަލު ގެނައުން އޮންނާނީ އެޕްރީލް 14 ގަ އެވެ. އަދި ބައިވެރިވާ ޓީމްތަކުގެ މެދުގައި ގުރުއަތުނެގުން ނެގުން އޮންނާނީ އެޕްރީލް މަހުގެ 19 ގަ އެވެ.
އައްޑޫ ކައުންސިލުން އިންތިޒާމުކޮށްގެން ބާއްވާ އައްޑޫ ފުޓްބޯޅަ ޗެމްޕިއަންޝިޕަކީ އައްޑޫގެ ޒުވާނުންގެ މެދުގައި އެއްބައިވަންތަކަން އަށަގަނުވައި، ކުޅިވަރުގެ ރޫޙް އާލާކޮށް، އައްޑޫގައި ހުނަރުވެރި ފުޓްބޯޅަ ކުޅުންތެރިން އުފައްދައި، ވާދަވެރި މާހައުލެއްގައި އެ ކުޅުންތެރިންނަށް ކުޅުމުގެ ފުރުސަތު ހޯދައިދިނުމުގެ މަގުސަދުގައި ބާއްވާ މުބާރާތެކެވެ.
މީގެ ފުރަތަމަ މުބާރާތް ބޭއްވީ 2019 ގަ އެވެ. މިދިޔަ އަހަރު 7 ޓީމް ވާދަކުރި މުބާރާތުގެ ޗެމްޕިއަނަކީ ފޭދޫ ސްޕޯޓްސް އެވެ.
ކައުންސިލުން ބުނީ މި ފަހަރުގެ މުބާރާތުގެ ހުރިހާ ކަމެއް ކައުންސިލާ ގުޅިގެން ވިލަރެސްކޮށް އިންތިޒާމު ކުރާނީ "ޔުނިޓީ ފައުންޑޭޝަން" އިން ކަމަށެވެ. އަދި މުބާރާތާ ބެހޭ އިތުރު މައުލޫމާތު މި ވެބްސައިޓް www.footballmaldives.com އިން ލިބޭނެ އެވެ.