އިއްޔެ ބޯކޮށް ވާރޭ ވެހި މާލޭގައި ފެންބޮޑުވި ހާދިސާއާ ގުޅިގެން އަނެއްކާ ވެސް މާލޭގެ މަގުތައް ރަނގަޅު ފެންވަރަށް ހެދުމުގެ ވާހަކަ ރައީސް ޑރ. މުހައްމަދު ދައްކަވައިފި އެވެ.
އެ މަނިކުފާނު ހައުސިން މިނިސްޓަރުގެ މަގާމުގައި ހުންނެވި ދުވަސްވަރު މާލޭގެ މަގުތައް ރަނގަޅު ފެންވަރަކަށް ތަރައްގީކޮށް، ފެންބޮޑުވާ މައްސަލަ ހައްލުކުރަން ބޮޑު މަޝްރޫއެއް ހިންގެވި އެވެ. އަދި އޭގެ ފަހުން ވެސް މާލޭގެ މަގުތަކުގެ ހާލަތު ރަނގަޅު ކުރަން މިހާތަނަށް އެކި ފަހަރު މަތިން މަސައްކަތްތަކެއްކޮށްފައިވެ އެވެ.
އެކަމަކު ބޯކޮށް ވާރޭ ވެހިއްޖެ ނަމަ ރާއްޖޭގެ ވެރިރަށުގައި ފެންބޮޑުވުމުގެ މައްސަލަ އަކީ މިހާތަނަށް އެކަށީގެންވާ ހައްލެއް ނުހޯދި އޮތް ބޮޑު މައްސަލައެކެވެ. ރާއްޖޭގައި މިހާތަނަށް އެންމެ ރަނގަޅަށް މަގުގައް ހަދައި، މަގުތައް ބަލަހައްޓަނީ ވެސް މާލޭގަ އެވެ. އެކަމަކު އާދައިގެ ރަށްރަށަށް ވުރެ މާލޭގެ ހާލަތު ދަށެވެ.
އިއްޔެ ފެންބޮޑުވުމާ ގުޅިގެން ގެއްލުންވި ގެތަކަށް ރައީސް މުއިއްޒު ކުރެއްވި ޒިޔާރަތުގެ ތެރޭގައި މީޑިއާތަކަށް ވިދާޅުވީ މާލޭގެ މަގުތަކުގައި ފެން ބޮޑުވުމަށް އޮތް ހައްލަކީ ހުރިހާ މަގެއް ވެސް ރަނގަޅު ފެންވަރަށް ހަދައި، މަގުތަކުގެ އަޑީގައި ވަރުގަދަ ސްޓޯމްވޯޓާ ނުވަތަ ވާރޭ ފެން ހިންދާ ނިޒާމެއް ގާއިމު ކުރުން ކަމަށެވެ.
ރައީސް ވިދާޅުވި ގޮތުގައި މިހާރު އޮތް ސްޓޯމްވޯޓާ ނިޒާމު މަސައްކަތް ކުރިޔަސް އެއީ މާލޭގެ މިހާރުގެ ހާލަތަށް އެކަށީގެންވާ ވަރުގެ ނިޒާމެއް ނޫން ކަމަށެވެ. އެހެންވެ ސަރުކާރުން ނިންމާފައި އޮތީ، މާލޭގެ ހުރިހާ މަގެއް ރަނގަޅު ފެންވަރަށް އަލުން ހަދައި، އާ ސްޓޯމްވޯޓާ ނިޒާމުގައި ފަލަ ހޮޅިތަކާއި ވަރުގަދަ ޕަމްޕިން ނިޒާމެއް ހިމެނުމަށް ކަމަށް ވިދާޅުވި އެވެ.
"އޭރުން އިރާދަ ކުރެއްވިއްޔާ މިފަދަ ސިޗުއޭޝަނެއްގައި ވެސް، ގެތައް ސަލާމަތްވެ، މީހުންގެ މުދަލާއި، ފުރާނައާއި، ދިރިއުޅުމަށް މި ކުރާ މަސައްކަތްތަކާއި، ވިޔަފާރިތައް ސަލާމަތް ކުރެވޭނެ." ރަައީސް ވިދާޅުވި އެވެ.