މި އަހަރުގެ ތެރޭގައި ރާއްޖޭގައި އަލަށް 12 ނުވަތަ 15 ވަރަކަށް ރިސޯޓް ހުޅުވޭނެ ކަމަށް ޓޫރިޒަމް މިނިސްޓަރު އިބްރާހީމް ފައިސަލް ވިދާޅުވެއްޖެ އެވެ.
ދައުލަތުގެ މީޑިއާ ޕީއެސްއެމްގެ ޕްރޮގްރާމެއްގައި މިނިސްޓަރު ވިދާޅުވީ އެ އަދަދަށް ރިސޯޓްތައް ހުޅުވިއްޖެ ބެޑް ކެޕޭސިޓީ އަށް 1،000 އެނދު އިތުރުވާނެ ކަމަށެވެ. ފައިސަލް ވިދާޅުވި ގޮތުގައި މި އަހަރުގެ އަމާޒަކީ މަދުވެގެން ދެ މިލިއަން ޓޫރިސްޓުން ގެނައުމެވެ.
މިނިސްޓަރު ވިދާޅުވީ ރިސޯޓް ތަރައްގީކުރަން ދޫކޮށްފައި ހުރި ވަރަށް އަދަދެއްގެ ރަށްތަކުގެ މަސައްކަތް ނުނިމި އެބަހުރި ކަމަށާއި އެ ރަށްތަކުގެ މަސައްކަތް އަވަސް ކުރުމަކީ ސަރުކާރުން ވަރަށް ބޮޑު އިސްކަމެއް ދޭނެ ކަމެއް ކަމަށެވެ.
"އަޅުގަނޑުމެން މިނިސްޓްރީގެ ތަފާސްހިސާބުތައް ދައްކާ ގޮތުގައި 63 ރަށެއް އެބައޮތް ދޫކުރެވި އެވޯޑް ކުރެވިގެން ބައެއް ރަށްރަށް އެބަހުރި 20 އަހަރު 10 އަހަރު 15 އަހަރު އެރަށްތައް މާކެޓަށް ނުނިކުމެ،" ފައިސަލް ވިދާޅުވި އެވެ. "އަޅުގަނޑުމެން ފުރަތަމަ ކަމަކަށް ޓޫރިޒަމް މިނިސްޓްރީން މި ކުރަމުންދާ މަސައްކަތަކީ އެރަށްތައް އައިޑެންޓިފައިކޮށް، އެ ރަށްތައްކަށް އިންވެސްޓްކޮށްފައި ތިބި ވިޔަފާރިވެރިން ހޯދައިގެން އެ ވިޔަފާރިވެރިންނާ އެކީ ވަރަށް ގާތް އެކުވެރި މާހައުލެއްގައި މަޝްވަރާކުރެވިގެން ކޮބައިތޯ އެ ވިޔަފާރިވެރިންނަށް ހުރި ދަތިތަކަކީ."
މިނިސްޓަރު ވިދާޅުވީ މަސައްކަތްތައް ނުނިމި ލަސްވެފައި ހުރި ރަށްތައް ނިންމުމަށްޓަކައި ގާނޫނާއި ޤަވާއިދުގެ ތެރެއިން ދެވޭނެ ފަސޭހަތަކާ ގުޅޭ ގޮތުން އެޓާނީ ޖެނެރަލާ އެކީ މަޝްވަރާތަކެއް ކުރެވެމުން އަންނަ ކަމަށެވެ.
"އަޅުގަނޑުގެ ވަރަށް ބޮޑު އަމާޒެއް ޓާގެޓެއް އެއީ އެހެން ނުހެދި ހުރި ރަށްތައްކުގެ ތެރެއިން ފަންސާސް ޕަސެންޓް މި ފަސް އަހަރުގެ ތެރޭގައި މާކެޓަށް ނެރުމަކީ." ފައިސަލް ވިދާޅުވި އެވެ.
ޓޫރިޒަމަކީ ރާއްޖޭގެ އިގުތިސާދުގެ މައި ސިނާއަތެވެ. ރާއްޖެ އަކީ ގިނަ އަދަދެއްގެ ރިސޯޓްތަކާއި ގެސްޓްހައުސްތަކުގެ އިތުރުން ވެސް ޓޫރިޒަމްގެ ތަފާތު ފެސިލިޓީތަކުގައި ހިދުމަތް ދެމުން އަންނަ ދުނިޔޭގެ ޓޫރިޒަމްގައި އެންމެ ފާހަގަކޮށްލެވޭ އެއް ގައުމެވެ.