އަންނަ ހަފްތާގެ ނިޔަލަށް މާލޭ ރައްޔިތުންނަށް ދޫކުރާ ގޯތިތަކުގެ ރެޖިސްޓްރީ ހަވާލުކޮށް ނިންމުމުގެ މަސައްކަތް ހައުސިންގް މިނިސްޓްރީން ކުރަމުންދާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
އެމަނިކުފާނު ވިދާޅުވީ، ގޯތި އަދި ފްލެޓު ލިބޭނެ ކަމަށް ލިސްޓުގައި ހިމެނި ގެޒެޓްކޮށްފައިވާ ފަރާތްތަކަށް ގޯތި އަދި ފްލެޓް ހަވާލުކޮށް ދިނުމަކީ އެމަނިކުފާނު ވެފައިވާ ވަޢުދެއް ކަމަށެވެ. އަދި އެކަން ވަޢުދުވީ ގޮތަށް ކުރިއަށް ދާނެ ކަމަށެވެ.
" މިހަފްތާއާއި މިއަންނަ ހަފްތާ ތެރޭ ރެޖިސްޓްރީ ހަވާލުކޮށް ނިންމުމުގެ މަސައްކަތް ހައުސިންގް މިނިސްޓްރީން ކުރިއަށް ގެންދާނެ. " ރައީސް ވިދާޅުވިއެވެ.
މީގެ އިތުުރުން މިހާރު ރެޖިސްޓްރީ ހަވާލުކޮށްފައިވާ އަދި ހަވާލު ކުރާ ތަންތަނަކީ ނުހިއްކާ ހުރި ތަންތަން ކަމުން، އެތަންތަން ހިއްކުމުގެ މަސައްކަތްވެސް ކުރިއަށްދާ ކަމަށް ރައީށް ވިދާޅުވިއެވެ.
" ގޯތި ދީފައިވާ ބައެއްތަންތަނަކީ ނުހިއްކާ ހުރި ތަންތަން ކަމުން އެތަންތަން ހިއްކުމުގެ މަސައްކަތް ބާރަށް ކުރިއަށްދާކަން ފާހަގަކޮށްލަން. އަދި ގުޅީފަޅާއި ގިރާވަރު ފަޅުން އިތުރު ބިން ހިއްކުމަށްވެސް ތައްޔާރުވަމުންދާކަން ފާހަގަކޮށްލަން. " ރައީސް ވިދާޅުވިއެވެ.
ކުރީ ސަރުކާރުގެ ގެދޮރުވެރިޔާ ސްކީމުގެ ދަށުން މާލޭ ރައްޔިތުންނަށް ބިން ދިނުމަށް ހުޅުވާލި ފުރުސަތުގައި ބިން ލިބޭ ފަރާތްތަކުގެ ލިސްޓެއް ވަނީ އާންމުކޮށްފައެވެ. އެ ލިސްޓުގައި ބިން ލިބޭނެ ކަމަށް ކަނޑައަޅާފައިވާ އެއްވެސް ފަރާތެއްގެ އަތުން ބިން އަތުނުލާނެ ކަމަށާއި، އަދި ބިން ލިބޭނޭ ކަމަށް ކަނޑައަޅާފައިވާ ސަރަހައްދުން އެ ބިން ބަދަލުވެސް ނުކުރައްވާނެ ކަމަށް ރައީސް މުއިއްޒު ވަނީ ކެމްޕެއިން ތެރޭގައި ވިދާޅުވެފައެވެ.