ސިއްހީ ދާއިރާ އިން ރިޓަޔާވެފައިވާ ހިދުމަތްތެރިންނަށް ކޮންޓްރެކްޓް އުސޫލުން މަސައްކަތް ކުރެވޭނެ ގޮތް ހަދައިފި އެވެ.
މިގޮތަށް ކެބިނެޓުން ނިންމެވިކަން އިއުލާން ކުރައްވައި ރައީސް އޮފީހުގެ ޕްރިންސިޕަލް ސެކްރެޓެރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ ޢަބްދުﷲ ނާޒިމު އަދިި ކުރީގެ ހެލްތު މިނިސްޓަރު އިބްރާހީމް ނާޒިމު ވިދާޅުވީ ސިއްހީ ދާއިރާގައި މަސައްކަތްކޮށް މުސްކުޅިކުރައްވާފައިވާ ފަރާތްތަކުގެ ތެރެއިން ވަޒީފާއަށް އަނބުރާ ނިކުންނަނަން ބޭނުންވާ ފަރާތްތަކަކީ ޞިއްޙީ ގޮތުންނާއި ތަޢުލީމާއި ހުނަރުގެ ގޮތުން ޤާބިލު ބޭފުޅުން ނަމަ ކޮންޓްރެކްޓް އުޞޫލުން އެ މީހުންނަށް ވަޒީފާތަކަށް ނުކުތުމުގެ ފުރުޞަތު ހަމަޖައްސާފައިވާ ކަމަށެވެ.
އޭނަ ވިދާޅުވީ މިކަން ފުޅާކޮށް ގެންދިޔުމަށްޓަކައި ސިއްހީ ދާއިރާގެ އިތުރުން އެހެނިހެން ދާއިރާތަކުން ވެސް މިފަދަ އުޞޫލުތަކެއް ހެދުމަށްޓަކައި ކަމާ ގުޅުން ހުރި ފަރާތްތަކާއި މަޝްވަރާ ކުރެވި "ހަފުތާ 14" ނިމުމުގެ ކުރިން ގޮތްތަކެއް ނިންމާނެ ކަމަށެވެ.
އެގޮތުން މިހާރު ސިއްހީ ދާއިރާއަށް އަލުން ނިކުންނަން ބޭނުންވާ ރިޓަޔާކޮށްފައިވާ މީހުން އަލުން ދާއިރާގައި ހިދުމަތް ކުރަން ފުރުސަތު ދިނުމުގެ ގޮތުން ކުރަން ޖެހޭ މަސައްކަތްތައް ހެލްތު މިނިސްޓްރީން ކުރަމުން އަންނަ ކަމަށް ނާޒިމު ވިދާޅުވި އެވެ.
"ހެލްތް ސެކްޓާތަގައި މިސާލަކަށް ހަތަރު ގަޑިއިރަށް މަސައްކަތް ކު ރާނަމަވެސް އަންނާނެ މީހުން ތިބުމަކީ އެކަށީގެންވާ ކަމެއް. މިސާލަކަށް ނަރުހުން،" އޭނަ ވިދާޅުވި އެވެ. "އެހެންވީމަ އެކަން އެކުލަވާލައްވައިގެން ހެލްތު މިނިސްތްރީއިން އެކަން ކުރިއަތް ގެންދަވާނެ."
ނާޒިމު ވިދާޅުވި ގޮތުގައި ވަޒީފާއަށް ނުކުންނަން ބޭނުންވާ ޚިދުމަތްތެރިންގެ ތެރެއިން 8 ގަޑިއިރަށް ވުރެ މަދުން މަސައްކަތް ކުރެވޭނެ މީހުންނަށް ވެސް ފުރުޞަތު ފަހިކޮށްދީ، މަސައްކަތް ކުރާ ވަގުތަށް ވަކި އުޖޫރައެއް ދިނުމަށް ކަނޑައަޅައި ސިވިލް ސާވިސް ގަވައިދުގައި ހިމެނުމަށް ވެސް ނިންމާފައިވާ ކަމަށެވެ.
ސަރުކާރުން ބުނީ މިކަމާ ގުޅޭ ސާވޭއެއް ވެސް ހަދާފައިވާ ކަމަށެވެ. އެގޮތުން ތަފާސްހިސާބުތަކެއް އެއްކޮށް ދަފުތަރެއް އެކުލަވާލުމުގެ މަސައްކަތް ވެސް އަންނަނީ ކުރަމުންނެވެ. ސަރުކާރުން ބުނި ގޮތުގައި މިއީ ޞިއްޙީ ދާއިރާގާއި ތަޖުރިބާ އާއި ޤާބިލު ބޭފުޅުން އިތުރުކުރުމަށް އެޅޭނެ މުހިންމު ފިޔަވަޅަކަށް ވާނެ އެވެ.