ރާއްޖޭގެ މަޝްހޫރު ވިޔަފާވެރިޔާ އަހުމަދު ސިޔާމު މުހައްމަދު (ސަން ސިޔާމު) ގެ ބައްޕަ މުހައްމަދު ގާސިމް އަވަހާރަވެއްޖެ އެވެ.
އުމުރުން 80 އަހަރުގައި ގާސިމް އަވަހާރަވީ އޭޑީކޭ ހޮސްޕިޓަލުގައި ފަރުވާ ދެމުން ދަނިކޮށް މިއަދު ފަތިހު އެވެ. ގާސިމް އެޑްމިޓްކުރީ ސިއްހީ ހާލަތު ގޯސްވެގެން މީގެ ދެ ދުވަހެއް ކުރިންނެވެ. އޭނަގެ ޖަނާޒާ ބާއްވަން ހަމަޖެހިފައި ވަނީ އަސްރު ނަމާދަށް ފަހު އެވެ. ގާސިމުގެ ކަށުނަމާދު އޮންނާނީ އިސްލާމީ މަރުކަޒުގަ އެވެ.
ގާސިމަކީ ނ. ކުޑަފަރީގެ ކަތީބުކަމާއި އެ ރަށު ސްކޫލުގެ ނާޒިރުކަން ވެސް ކުރައްވާފައިވާ ބޭފުޅެކެވެ.
ގާސިމްގެ ބޭފުޅުންގެ ތެރެއިން ސިޔާމަކީ ރާއްޖޭގެ ރިސޯޓް ވިޔަފާރިގައި އެންމެ ނުފޫޒު ގަދަ އެކެކެވެ. އޭނަ އަކީ ސަން ގްރޫޕްގެ ވެރިޔާގެ އިތުރުން މޯލްޑިވްސް ޑިވެލޮޕްމަންޓް އެލައިންސް (އެމްޑީއޭ) ގެ ވެރިޔާ އެވެ. ސިޔާމަކީ މަޖިލީހުގެ މީދޫ ދާއިރާގެ މެމްބަރު ވެސް މެ އެވެ.
ސިޔާމާ އެކީ ގާސިމަށް ދެބަނޑަށް ޖުމްލަ 9 ބޭފުޅުން ލިބިވަޑައިގެންފައިވެ އެވެ.