ފުލުހުން ސްކޫލް ކުދިންނަށް އަމާޒުކޮށްގެން ކުރިއަށް ގެންދާ "ބްލޫޒް ފޮ ޔޫތު" ކޭމްޕް ރޭ އައްޑޫގައި ފަށައިފި އެވެ.
ކޭމްޕް ފެށުމަށް ރޭ ހިތަދޫ ޝަރަފުއްދީން ސްކޫލްގައި ބޭއްވި ރަސްމިއްޔާތު އިފުތިތާހުކޮށް ދެއްވީ އައްޑޫ ސިޓީ ކައުންސިލް އިދާރާގެ ޒިންމާދާރުވެރިޔާ މުހައްމަދު ސައުދީ އެވެ.
ސައުދީ ރޭ ވިދާޅުވީ ސްކޫލް ކުދިންނަށް އަމާޒުކޮސްގެން ފުލުހުން މިފަދަ ޕްރޮގްރާމްތަކެއް ކުރިއަށް ގެންދިއުމަކީ ވަރަށް ބޮޑެތި ފައިދާތަކެއް ކުރާނެ ކަމެއް ކަމަށެވެ.
ހާއްސަކޮށް ކުށްކުށް އަރައި ގަތުން ފަދަ އާދަތަކުން ދަރިވަރުންނަށް އަރައި ގަނެވި، ހަރުދަނާ މުޖުތަމައެއް ބައްޓަން ކުރުމަށް ދަރިވަރުންނަށް ހިންގާ މިފަދަ ޕްރޮގްރާމްތަކުން ދަސްވެގެން ދާނެ ކަމަށް ގަބޫލް ކުރައްވާ ކަމަށް ސައުދީ ވިދާޅުވި އެވެ.
އޭނާ ވިދާޅުވީ އައްޑޫގެ ސްކޫލްތަކަކަށް އަމާޒުކޮށްގެން ކުރިއަށް ގެންދާ "ބްލޫޒް ފޮ ޔޫތު" އަކީ ދަރިވަރުންނަށް ފައިދާ ހުރި އެތައް ކަމެއް ދަސްވާ ކާމިޔާބު ކޭމްޕަކަށް ވެގެން ދާނެ ކަމަށް ގަބޫލް ކުރައްވާ ކަމަށް ވިދާޅުވި އެވެ. އަދި ކޭމްޕްގެ ބޭނުން ވީހާ ވެސް ރަނގަޅަށް ހިފުމަށް ދަރިވަރުންނަށް ސައުދީ ނަސޭހަތްތެެރިވެވަޑައިގެންނެވި އެވެ.
ރޭގެ ރަސްމިއްޔާތުގައި ކޭމްޕްގައި ބައިވެރިވާ ސްކޫލްތަކުގެ އިސްވެރިންނާއި ފުލުހުންދެ ދެކުނު ޑިވިޝަންގެ ކޮމާންޑަރު ޗީފް އިންސްޕެކްޓަރު އޮފް ޕޮލިސް ހުސައިން ސަމީރާއި އައްޑޫގެ އިސް ފުލުހުން ބައިވެރިވަޑައިގެންނެވި އެވެ.
ހަތް ދުވަހުގެ މުއްދަތަށް ދެ ޖިންސްގެ ކުދިން ހިމަނައިގެން ކުރިއަށް ގެންދާ "ބްލޫޒް ފޯ ޔޫތު" އައްޑޫ ކޭމްޕްގައި ފަސް ސްކޫލަކުން 100 ދަރިވަރުން ބައިވެރިވެ އެވެ. "ބްލޫޒް ފޮ ޔޫތު" އައްޑޫ ކޭމްޕް ކުރިއަށް ގެންދާ ގޮތަށް ހަމަޖެހިފައި ވަނީ ޝަރަފުއްދީން ސްކޫލްގަ އެވެ.
މި ކޭމްޕުގައި ބައިވެރިންނަށް ރަނގަޅު އަޚްލާޤާއި ހަރުދަނާ އުޞޫލުތަކަށް މަގުފަހި ކުރުމަށް ބޭނުންވާ ގިނަ ޙަރަކާތްތަކަކާއި ސިފަވަންތަ ދިރިއުޅުމަކަށް ބޭނުންވާ ކަންކަން ނުވަތަ ލިވިން ވެލިއުސްގެ ގިނަ ކަންތައްތަކެއް އުގަންނައި ދެވޭނެ އެވެ. އަދި ޒިންމާދާރު ބައެއްގެ ގޮތުގައި ދެމިތިބުމަށް ކުރަންޖެހޭނެ ކަންތައްތަކުގެ މަޢުލޫމާތު ދީ އެފަދަ ކަންކަން ދަސްކޮށް ދެވޭނެ އެވެ.
މީގެ އިތުރުން ކަންކަމުގައި އިސްނަގައި، ޙަރަކާތްތެރިވުމަށް ބާރުއަޅައިދޭފަދަ ޙަރަކާތްތަކާއި، ޤައުމީ ލޯބި އިތުރު ކުރުމާއި ޤައުމިއްޔަތު ދެމެހެއްޓުމަށާއި ދީނީ ކަންކަމަށް ސަމާލުކަންދީ ދީނީ އާދަތަކަށް ދަރިވަރުން އަހުލުވެރިކުރުވައި، ޤާނޫނާއި ޤަވާޢިދުތަކަށް ބޯލެނބުމަށް މިކޭމްޕުގައި ދަރިވަރުންނަށް ވަނީ ދަސްކޮށް ދިނުމަށް ވެސް ވަނީ ހަމަޖެހިފަ އެވެ.
އަދި ހަމަ މިއާއެކު ދަރިވަރުންނަށް މުހިއްމު ބައެއް ޤާނޫނޫތައް ކަމުގައިވާ ޢާއްމު އިޖްތިމާޢީ މިންގަނޑުތަކާ ޚިލާފު ޢަމަލުތައް ހުއްޓުވުމުގެ ޤާނޫނާއި، އެއްގަމު ދަތުރުފަތުރުގެ ޤާނޫނާއި، ކުޑަކުދިންގެ ޙައްޤުތައް ރައްކާތެރިކުރުމުގެ ޤާނޫނުގެ ދަށުން ދަރިވަރުންނަށް ލިބިދެވޭ ރައްކާތެރިކަމާއި ދަރިވަރުން ރައްކާތެރިވާންޖެހޭ މާއްދާތައް ދަރިވަރުންނަށް އޮޅުން ފިލުވައި ދޭނެ އެވެ.
އަދި ދަރިވަރުންގެ ހޭލުންތެރިކަން އިތުރު ކުރަން ޖެހޭ އެންމެ މުހިއްމު އެއް ދާއިރާ ކަމުގައިވާ ސައިބަ ކްރައިމް އަކީ ކޮބައިކަމާއި ސައިބަ ކްރައިމް އިން ދުރުވުމަށް ދަރިވަރުންނަށް އޮޅުން ފިލުވައި ދިނުމާއި ހެޔޮ އަދި ދަރިވަރުންނަށް ރައްކާތެރި ގޮތުގައި ސޯޝަލް މީޑިއާ ބޭނުން ކުރެވޭނެ ގޮތްތަކާ ބެހޭ ގޮތުން ވެސް "ބްލޫޒް ފޮ ޔޫތު" ކޭމްޕުގައި ދަރިވަރުންނަށް މަޢުލޫމާތު ދިނުމަށް ވަނީ ހަމަޖެހިފަ އެވެ.