ވައިގެ މަގުން ރާއްޖެ އަށް މަސްތުވާތަކެތި އެތެރެކުރި ދިވެހި ދެމަފިރިއަކު ހައްޔަރުކޮށް ބަންދުކޮށްފި އެވެ.
ކްރިމިނަލް ކޯޓުން އިއްޔެ ނެރުނު އަމުރެއްގައި ބުނީ އެ މައްސަލައިގައި ހައްޔަރުކުރީ މާލެ އަށް ނިސްބަތްވާ 27 އަހަރުގެ ފިރިހެނަކާއި ހދ. ނެއްލައިދު އަށް ނިސްބަތްވާ 20 އަހަރުގެ އަންހެނެއް ކަމަށެވެ. އަމުރުގައިވާ ގޮތުން ދެމަފިރިން ހައްޔަރުކޮށް ބަންދަށް 15 ދުވަސް ޖެހީ އެ މީހުން ރާއްޖެ އިން ބޭރުން އައިއިރު ގެނައި ލަގެޖުން ގިނަ އަދަދެއްގެ މަސްތުވާތަކެތި ފެނިފައިވާ މައްސަލައިގައި ކަމަށެވެ.
އަދި އެ ދެމަފިރިންގެ ކުޑަކަމުދާތަކެތި ޓެސްޓް ކުރިއިރު ސީއޯސީ، ޓީއެޗްސީ އާއި ބެންޒޯ އަށް ޕޮޒިޓިވް ވެފައިވާ ކަމަށް ވެސް އަމުރުގައިވެ އެވެ.
އެ ދެމަފިރިންނަށް ކުރާ ތުހުމަތުތަކުގެ ތެރޭގައި ޚާއްސަ އުކުޅެއް ބޭނުންކޮށްގެން ރާއްޖެ އަށް މަސްތުވާތަކެތި އެތެރެކުރުމާއި އެ މީހުންގެ އަތުން ގިނަ އަދަދެއްގެ މަސްތުވާތަކެތި ފެނިފައިވުން ހިމެނެއެވެ. މަސްތުވާތަކެތި ފެނުނު ލަގެޖަކީ މީހަކު ބުނެގެން ގެނައި އެއްޗެއް ކަމަށް ދެ މީހުން ބުނެފައިވާ އިރު މިކަމުގައި އިތުރު ބައެއްގެ ބައިވެރިވުން އޮތް ކަމަށް ބުރަވެވޭ ކަމަށް ވެސް ކްރިމިނަލް ކޯޓުން ބުންޏެވެ.