މާލެ އިން ކާށި ބަސްތާއެއް ވަގަށް ނެގި މައްސަލައެއްގައި ހައްޔަރުކުރި ބައެއްގެ ކްރިމިނަލް ކޯޓުން މުއްދަތު ޖަހައިފި އެވެ.
ފަސް ދުވަހަށް ބަންދުކުރަން މުއްދަތު ޖެހީ 33 އަހަރުގެ ދިވެހި ދެ ފިރިހެނުންނެވެ.
ފުލުހުން އެ ދެ މީހުން ހައްޔަރުކުރީ ސައިކަލުގައި ދަމުން ކާށި ބަސްތާއެއް ގެންދިޔަ ތަން ފެނިގެން އަމަލުތައް ހުރި ގޮތުން ޝައްކުވެގެންނެވެ. އެގޮތުން އެ މީހުން ސުވާލުކުރުމުން ދެ މީހުންވެސް ބުނެފައި ވަނީ ކާށި ބަސްތާ އަކީ އެ މީހުން ސައިކަލު ޕާކުކުރި ތަނުގައި އޮތް އެއްޗެއް ކަމަށެވެ.
ކާށި ބަސްތާ ވަގަށް ނެގި މައްސަލައިގައި އެކަކު ބުނެފައި ވަނީ އޭނާ ހައްޔަރުކުރި އިރު ފުލުހުން ޤާނޫނީ އިންޒާރު ދީފައި ނުވާ ކަމަށެވެ. ނަމަވެސް "ހައްޔަރުކުރެވޭ މީހާގެ މައުލޫމާތު ފޯމު" ގައި އޭނަ އަށް ގާނޫނީ އިންޒާރު ދިންކަމަށާއި، ފޯމުގައި ސޮއިކުރަން އޭނަ އިންކާރުކުރި ކަމަށް ބުނެ ދެ ފުލުހަކު ސޮއިކޮށްފައިވެ އެވެ.