ރާއްޖެ އަށް ފެންވަރު ރަނގަޅު ބޭސްތައް އެތެރެކުރުމަށްޓަކައި ކުރަން ޖެހޭ މަސައްކަތްތަކަށް ހާއްސަކޮށްގެން އެކަމާ ގުޅޭ އާ ގައިޑްލައިނެއް އެކުލަވާލުމުގެ މަސައްކަތް ހެލްތު މިނިސްޓްރީން ފަށައިފި އެވެ.
މިނިސްޓަރު ޑރ. އަބްދުﷲ ހަލީލު ޕީއެސްއެމްގައި ވިދާޅުވީ ފެންވަރު ރަނގަޅު ބޭސް ލިބުމަށް ރައްޔިތުން އަބަދު ވެސް އެދޭ ކަމަށެވެ. އަދި މިއީ ރައްޔިތުންގެ ސިއްހަތާ ވަރަށް ބޮޑަށް ގުޅިފައި އޮތް ކަމަކަށްވާތީ ފެންވަރު ރަނގަޅު ބޭސް ރާއްޖެ އެތެރެ ކުރުމަކީ އިސްކަން ދޭން ޖެހޭ ކަމެއް ކަމަށް ވެސް ވިދާޅުވި އެވެ.
މިނިސްޓަރު ވިދާޅުވި ގޮތުގައި މިހާރު ބޭސް އެތެރެ ކުރުމާ ބެހޭ ގައިޑްލައިނުގައިވާ ގޮތުން ބޭހެއް ރާއްޖެ އެތެރެ ކުރެވެނީ ބޭހުގެ ކޮންޓެންޓް އެނގިގެން ކަމަށް ވިޔަސް ބޮޑެތި ވިޔަފާރިތަކުން އެ ކޮންޓެންޓް ހާމަކުރަން ދެކޮޅުހަދާ ކަމަށެވެ. އެހެންވެ އެ ކުންފުނިތަކުން އެއްވެސް ބޭހެއް ރާއްޖެ އެތެރެކުރުމުގެ ދޮރުތައް ވަނީ ބަންދުވެފައި ކަމަށް މިނިސްޓަރު ވިދާޅުވި އެވެ.
ހަލީލު ވިދާޅުވީ އެ ދަތިކަން ހައްލުކޮށް ފަސޭހަކޮށް ބޭސް އެތެރެކުރެވޭނެ މަގު ތަނަވަސް ކުރުމަށް މަސައްކަތް ކުރަމުން އަންނަ ކަމަށެވެ. އެގޮތުން ބޭސް އެތެރެކުރަން ތަރައްގީ ވެފައިވާ ގައުމުތަކުގައި ހުއްދަ ދީފައިވާ ބޭސްތައް އެތެރެކުރެވޭނެ ގޮތް ހެދުމަށް، ދުނިޔޭގެ ސިއްހަތު ޖަމިއްޔާ، ޑަބްލިއުއެޗްއޯގެ މަޝްވަރާގެ މަތިން ގައިޑްލައިނަށް އިސްލާހު ކުރުން ކުރިއަށްދާ ކަމަށް މިނިސްޓަރު ވިދާޅުވި އެވެ.