ފ. ނިލަންދޫގައި އެއާޕޯޓެއް ތަރައްޤީ ކުރަން ބޭނުންވާ ބިން ހިއްކުމުގެ މަސައްކަތް ކުރުމުގެ ކުރިން ބޭނުންވާ އީއައިއޭ ހެދުމަށް އެމްޓީސީސީ އާއި ހަވާލުކޮށްފިއެވެ.
މިއަހަރުގެ ބަޖެޓުގައި ހިމެނިގެން ކުރިއަށްދާ މި މަޝްރޫޢުއާއި ގުޅޭގޮތުން މިނިސްޓަރ ޑރ. އަބްދުﷲ މުއްތަލިބް ވިދާޅުވީ، މި މަޝްރޫއުގެ މަސައްކަތް 120 ދުވަހުގެ ތެރޭގައި ނިންމަން ހަމަޖެހިފައިވާ ކަމަށާއި، އޭއާއެކު އެތަނަށް ބޭނުންވަނީ ކިހާވަރެއްގެ ވެލި ކަމާއި އަދި ޝޯރ ޕްރޮޓެކްޝަން މަސައްކަތް ކުރުމަށް އެނގެންޖޭ ކަންކަން ސާފު ވެގެން ދާނެ ކަމަށެވެ. މީގެ އިތުރުން މިއަހަރު ބަޖެޓުގައި ހިމެނިފައިވަނީ އެއާޕޯޓެއް އަޅަން ބޭނުންވާ ބިން ހިއްކުމުގެ މަސައްކަތްކަން މިނިސްޓަރ ފާހަގަ ކުރެއްވިއެވެ.
ނިލަންދޫގައި އެއާޕޯޓެއް އެޅޭއިރު، ފ. މަގޫދޫގައި އެއާޕޯޓު މަސައްކަތް ނިމުމާކާއި ގާތަށް ވަނީ ގޮސްފައެވެ. އެގޮތުން މިއަހަރު ކުރީކޮޅު އެ އެއާޕޯޓުގެ ޚިދުމަތް ދޭން ފެށިގެން ދާނެ ކަމަށް ރީޖަނަލް އެއާޕޯޓްސް ކުންފުނިންވެސް ވަނީ މީގެ ކުރިން ހާމަކޮށްފައެވެ.
މިކަމަށް އިޝާރަތްކޮށް ނޫސްވެރިއަކު ކުރި ސުވާލަކަށް ޖަވާބު ދެއްވަމުން ކޮންޓްރަކަޝަން މިނިސްޓަރ ޑރ. އަބްދުﷲ މުއްތަލިބު ވިދާޅުވީ އެ މިނިސްޓްރީގެ ޒިންމާ އަކީ ބަޖެޓުގައި ހިމެނިފައިވާ މަސައްކަތް ކުރިއަށް ގެނދިއުން ކަމަށާއި މި މަޝްރޫޢުގެ ކުރެހުންތަކާއި ބައެއް މަސައްކަތްތައް މީގެ ކުރީ ސަރުކާރުތަކުންވެސް ކޮށްފައިވާ ކަމަށެވެ.
"ގާތްގަނޑަކަށް 15 ވަރަކަށް މިނެޓު ދުރުގައި އެއާޕޯޓެއް އެޅިގެން އެބަދޭ. އެއާޕޯޓުގެ މަސައްކަތް ފުދޭވަރަކަށް ކުރިއަށް ގޮސްފައި އޮތީ. ދެން މިމަޝްރޫޢު އަކީ މި އަހަރުގެ ބަޖެޓުގައި ހިމެނިފައި އޮތް މަޝްރޫޢެއް. ކުރީ ސަރުކާރުތަކުންވެސް ގޮތްގޮތަށް ޕްލޭން ކުރެވިފައި އޮތް މަޝްރޫޢެއް މިއީ. " މިނިސްޓަރ މުއްތަލިބު ވިދާޅުވިއެވެ.
މިނިސްޓަރ ވިދާޅުވި ގޮތުގައި އެއާޕޯޓު އަޅަން ނިންމަނީ އެ މިނިސްޓްރީގެ މެނޑޭޓުގެ ތެރެއިން ނޫން ކަމަށެވެ. އެގޮތުން ރާއްޖޭގެ ފަތުރުވެރިކަމާއި އަދި އެ ސަރަހައްދެއްގެ ކައުންސިލްތަކާއި އަދި ގިނަ ކަންކަން ބެލުމަށް ފަހު އިކޮނޮމިކް އަދި އާރބަަން ޑިވެލޮޕްމެންޓްގެ ފަރާތުން ނިންމޭ ކަމެއްގެ ގޮތުގައި މިނިސްޓަރ ފާހަގަ ކުރެއްވިއެވެ.
"އަޅުގަނޑުމެން މިހާރު މިކުރާ ކަމަކީ ދައުލަތުގެ ބަޖެޓުގައި ހިމެނިފައި އޮތް މަޝްރޫޢުއެއް ފެށުމަށް ޓަކައި ކުރަން ޖެހޭ ކަންކަން ކުރުން " މިނިސްޓަރ މުއްތަލިބު ވިދާޅުވިއެވެ.
ނިލަންދޫގައި އެއާޕޯޓެއް ތަރައްޤީ ކުރަން ނިންމައި ބިން ހިއްކުމަށް ސާވޭތައް ކުރުމަށް އެމްޓީސީސީ އާއި ހަވާލުކޮށްފައިވާއިރު، ކައިރީގައި އޮތް މަގޫދޫގައި އެއާޕޯޓް ތަރައްޤީ ކުރަނީވެސް އެމްޓީސީސީގެ ފަރާތުންނެވެ.