ސްޓޭޓް ޓްރޭޑިންގް އޯގަނައިޒޭޝަން (އެސްޓީއޯއިން) އައްޑޫގައި ކާޑު ބާވަތްތައް ޑެލިވެރީ ކޮށްދިނުން ހުއްޓާލައިފިއެވެ.
އެސްޓީއޯގެ އައްޑޫ ފިހާރަތަކުން ކާޑުގެ ބާވަތްތައް ޑެލިވަރީކޮށްދިނުން ހުއްޓާލާފައިވާއިރު، އައުޓްލެޓްތަކުން ގަންނަ ކޮންސްޓްރަކްޝަން ސާމާނާއި އެހެން ބޮޑެތި ސާމާނުތައް އަދިވެސް ޑެލިވަރީ ކޮށްދެއެވެ. އައްޑޫގައި ކާޑު ބާވަތްތައް ޑެލިވަރީ ކުރަމުން އައި 5ރ. ކުޑަ އަގެއް ނަގައިގެންނެވެ. ނަމަވެސް މިމަހުގެ 1 ވަނަ ދުވަހުން ފެށިގެން ޑެލިވަރީ ހުއްޓާލުމާއެކު މިކަމުގެ ކަންބޮޑުވުން އާންމު ބައެއް ފަރާތްތަކާއި އަދި އައްޑޫގެ ބައެއް ވިޔަފާރިތަކުންވެސް ވަނީ އުފުލާފައެވެ.
މީގެ ކަމާއި ގުޅިގެން އެސްޓީއޯއިން ވިދާޅުވީ، މިއީ އެއްވެސް ތަނެއްގައި އެސްޓީއޯއިން ދޭ ޚިދުމަތެއް ނޫން ކަމަށެވެ. ނަމަވެސް އައްޑޫއިން ދެމުން ދިޔަ ޚިދުމަތެއް ކަމަށެވެ. އަދި މި ބަދަލަކީ އޭޖެންޓު މޮޑެލްއަށް މުޅި ނިޒާމު ބަދަލުވެގެން ދާއިރު، އެކަން ކުރެވޭނެ ގޮތެއް ނޫން ކަމަށެވެ. މީގެ ކުރިން އެސްޓީއޯގެ ނެޓްވޯކުގެ ތެރެއިން އައްޑޫގައި ޑެލިވަރީ ކޮށްދެމުން އައި ކުޑަ އަގެއް ނަގައިގެން ކަމަށާއި ނަމަވެސް އެއީ މިވަގުތައް ބަލާ އެގޮތަށް ކުރެވެން އޮތް ކަމެއް ނޫން ކަމެއް ކަމަށް އެކުންފުނިން ބުނިއެވެ. އަދި އެސްޓީއޯގެ ފަރާތުން އެކަން ހުއްޓާލީ ކުރިއާލާ ރޭވި ނިންމިގެން ކަން އެކުންފުނިން ފާހަގަ ކުރިއެވެ.
އެސްޓީއޯއިން ކާޑުގެ ބާވަތްތައް އެހެން ސަރަހައްދުތަކުގައި ޑެލިވަރ ކޮށްދެނީ އާންމުކޮށް އޭޖެންޓު މެދުވެރިކޮށެވެ. މައުލޫމާތު ލިބިފައިވާ ގޮތުގައި ކާޑުގެ ބާވަތްތައް ޑެލިވަރ ކުރުމަށް އައްޑޫއިން އޭޖެންޓެއް ހޯދުމަށް މަސައްކަތްވެސް ކުރެވިފައި ވެއެވެ. ނަމަވެސް އެކަށީގެންވާ ތަރުހީބެއް އެކަމަށް ލިބިފައި ނުވާ ކަމަށް އައްޑޫލައިވްއަށް ވަނީ އެނގިފައެވެ.
އެސްޓީއޯއިން ބުނީ ކާޑުގެ ބާވަތްތައް ރައްތަކުގައި ވިއްކަނީ އޭޖެންޓު މެދުވެރިކޮށް ކަމަށާއި، މިވަގުތު އޭޖެންޓު ނެތް ރައްތަކަށް އޭޖެންޓު ހޯދުމުގެ މަސައްކަތް ކުރާނެ ކަމަށެވެ.