ދިރާސީ އަހަރުގެ ދެވަނަ ޓާމްގެ ކިޔެވުން މާދަމާ ފަށަން ތައްޔާރުވެއްޖެ އެވެ.
ފުރަތަމަ ޓާމަށް ފަހު ދަރިވަރުން 17 ދުވަހުގެ ޗުއްޓީއަކަށް ދިޔައީ މިދިޔަ މަހުގެ 21 ގަ އެވެ. ޗުއްޓީ ނިންމާލައި ދެވަނަ ޓާމަށް ސްކޫލްތައް މާދަމާ ހުޅުވަން މިހާރު ވަނީ ތައްޔާރުވެފަ އެވެ. ފުރަތަމަ ޓާމްގައި ކިޔެވީ 93 ދުވަހު އެވެ. ދެވަނަ ޓާމުގައި 108 ދުވަހު ކިޔަވައި ދޭނެ އެވެ.
މާދަމާ ސްކޫލްތައް ހުޅުވާތީ ސްކޫލްތައް ހުޅުވާތީ ވަމުން އަންނަ ތައްޔާރީތަކުގެ ތެރެއިން ފުލުހުން އަންނަނީ ސްކޫލްތައް ހިމެނޭ ސަރަހައްދުގައި ޓްރެފިކް ބެލެހެއްޓުމަށް ތައްޔާރުވަމުންނެވެ. އެގޮތުން މާލެ ސަރަހައްދުގެ ސްކޫލްތަކުގެ ކައިރީގައި ޕާކްކޮށްފައި ހުރި ވެހިކަލްތައް ނެގުމަށާއި ސްކޫލް ގަޑިތަކުގައި ސްކޫލްތައް ހިމެނޭ ސަރަހައްދުތަކުގައި ދުއްވުމުގައި ހާއްސަ ސަމާލު ކަމެއް ދިނުމަށް ފުލުހުން އެދިފައިވެ އެވެ.
ފުލުހުން ބުނީ ފުލުހުން ހަރަކާތްތެރިވާ ހުރިހާ ރަށެއްގައި ވެސް ސްކޫލް ގަޑިތަކުގައި ޓްރެފިކް ބެލެހެއްޓުމަށް ހާއްސަ މަސައްކަތްތަލެއް ކުރާނެ އެވެ.
މި އަހަރުގެ ދިރާސީ އަހަރުގެ ކިޔެވުން ފެށީ މިދިޔަ އަހަރުގެ އޮގަސްޓް 6 ގަ އެވެ. އެގޮތުން އެއީ 216 ސްކޫލެއްގައި ޖުމްލަ 84،200 ދަރިވަރުން ކިޔަވަ އެވެ.