އަންނަ އަހަރުގެ މަޖިލިސް އިންތިހާބުގައި ވާދަނުކުރައްވާނެ ކަމަށް ލ. ގަމު ދާއިރާގެ މެންބަރު މުހައްމަދު ވިސާމް ވިދާޅުވެއްޖެ އެވެ.
އޭނަ ސޯޝަލް މީޑިއާ ޕޯސްޓެއްގައި ވަނީ މަޖިލިހުގެ ގަމު ދާއިރާގެ މެމްބަރުގެ ހައިސިއްޔަތުން ގަމާއި މުންޑޫ އަށް ފާއިތުވި ފަސް އަހަރުގެ ތެރޭގައި ހިދުމަތް ކުރުމުގެ ފުރުސަތު ދެއްވި ކަމަށްޓަކައި ދާއިރާގެ ރައްޔިތުންނަށް ޝުކުރު އަދާކުރައްވައުފަ އެވެ.
"މިދިޔަ ފަސް އަހަރުގެ ތެރޭގައި ދާއިރާގެ ރައްޔިތުންނާ ގާތުން ރަށްތަކުގެ ހާލަތު ރަނގަޅު ކުރުމަށް ގިނަ މަސައްކަތްތަކެއް ކޮށްދެވިފައިވާ ކަމަށް އުންމީދުކުރަން،" ްއެމްޑީޕީ އަށް ނިސްބަތްވާ ވިސާމު ވިދާޅުވި އެވެ. "މި ފުރުސަތުގައި އަޅުގަނޑަށް މިކަމުގައި އެއްބާރުލުން ދީ އެހީތެރިކަން ފޯރުކޮށްދިން ހުރިހާ ބޭފުޅުންނަށް ހިތުގެ އެންމެ ފުންމިނުން އިހުލާސްތެރި ޝުކުރު އަދާކުރަން."
އޭނަ އަކީ ކުރިން ނޫސްވެރިއެއްގެ ގޮތުގައި މަސައްކަތްކުރެއްވި ބޭފުޅެކެވެ. އެގޮތުން ގިނަ ދުވަސްތަކެއް ވަންދެން ވިސާމް ރާއްޖެ ޓީވީގެ ރިޕޯޓަރެއްގެ ގޮތުގައި މަސައްކަތް ކުރެއްވި އެވެ.