ރައީސް އޮފީހާއި ސަރުކާރުގެ ބައެއް ވުޒާރާތަކުގެ ވެބްސައިޓުތައް ޑައުންވެއްޖެއެވެ.
މި ވެބްސައިޓުތައް ޑައުންވެފައިވަނީ މިރޭގެ ވަގުތެއްގައެވެ. ނަމަވެސް ވެބްސައިޓުތައް އެއްކޮށް ޑައުންވީ ސަބަބެއް ސަރުކާރުގެ އެއްވެސް އިދާރާއަކުން މިހާތަނަށް ހާމަކޮށްފައި ނުވެއެވެ. ޑައުން ވެފައިވާ ވެބްސައިޓުތަކުގެ ތެރޭގައި ރައީސް އޮފީހުގެ ވެބްސައިޓާއި، ފޮރިން މިނިސްޓްރީގެ ވެބްސައިޓާއި އަދި ޓުއަރިޒަމް މިނިސްޓްރީގެ ވެބްސައިޓު ހިމެނެއެވެ.
މިކަން މިހާރު ނޭޝަނަލް ސެންޓަރ ފޯ އިންފޮމޭޝަން ޓެކްނޮލޮޖީ އަދި ސަރުކާރުގެ އިދާރާތަކާއި ގުޅިގެން ބަލަމުންދާ ކަމަށް ސަރުކާރުން ބުނެއެވެ.
މި ވެބްސައިޓުތަކަށް މިވަގުތު ނުވަދެވޭއިރު، އިންޑިއާގެ ސޯޝަލް މީޑިއާގައި ރާއްޖޭގެ ފަތުރުވެރިކަމާއި ދެކޮޅަށް ބޮޑު ކެމްޕެއިނެއް ރާވައި ދަނީ ހިންގަމުންނެވެ. ބައެއް ފަރާތްތަކުން މިއީ ސައިބާ އެޓޭކެއް ކަމަށް ތުހުމަތުކޮށްފައިވާއިރު، މިދެކަން ގުޅުވައި ވާހަކަ ދަނީ ވާހަކަ ދައްކަމުންނެވެ. ނަމަވެސް މިއީ ކިހެނެތް ދިމާވި ކަމެއްކަން ސަރުކާރުން މިހާތަނަށް ސާފުކޮށް ނުދެއެވެ. އަދި ރަސްމީ އެއްވެސް އިދާރާއަކުން މިކަމާއި ގުޅޭގޮތުން ވަކި އެއްޗެއް އިތުރަށް ނުބުނެއެވެ.
ސަރުކާރުގެ ވެބްސައިޓުތަކަށް މީގެ ކުރިންވެސް ސައިބާ ހަމަލާތައް އަމާޒުވެފައި ވެއެވެ.