ސަރުކާރަށް ނިސްބަތްވާ ކެންޑިޑޭޓަކު މާލޭގެ މޭޔަރު ކަމަށް ހޮވުމަކީ ރައްޔިތުންނަށް ލިބޭނެ ވަރަށް ބޮޑު ގެއްލުމަކަށް ވާނެކަމޫ ކަށަވަރު ކަމަށް ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދު ވިދާޅުވެއްޖެ އެވެ.
ސަރުކާރު ހިންގާ ޕާޓީ، ޕީއެންސީގެ ޓިކެޓްގައި ވާދަކުރައްވާ ކުރީގެ އެޓާނީ ޖެނެރަލް އާޒިމާ ޝުކޫރަށް އިޝާރާތްކުރައްވައި ސޯޝަލް މީޑިއާ ޕޯސްޓެއްގައި ޖަމީލު ވިދާޅުވީ ތިމާގެ އަމިއްލަ މައްސަލަތައް ފުނިޖެހިފައިވާ މީހަކަށް ރައްޔިތުންނަށް ޚިދުމަތް ކުރުމަށް ހުރަހަކަށް ވާނެ ކަމަށެވެ. އާޒިމާ އަކީ މޯލްޑިވްސް އިސްލާމިކް ބޭންކް (އެމްއައިބީ) އިން ނެންގެވި ލޯނެއް ނުދައްކަވައިގެން އެ ލޯނު ދައްކަން ސިވިލް ކޯޓުން ހުކުމެއް އިއްވާފައިވާ ބޭފުޅެކެވެ.
"އަމިއްލަ ފަރުދުންނަށާއި އިދާރާތަކަށް އަދާކުރަން ޖެހޭ ޒާތީ އިލްތިޒާމްތައް އަދާނުކުރެވޭ ފަރާތަކަށް އިތުބާރު ކުރުމަކީ ޑިމޮކްރަސީ ދަންނަކަމެއް ނޫން،" ޖަމީލު ވިދާޅުވި އެވެ. "އަދި އެފަދަ ފަރާތަކަށް ފުނިޖެހިފައިވާ މާލޭގެ މައްސަލަތައް ޙައްލު ކުރެވިދާނެ ކަމަށް އިތުބާރު ކުރުމަކީ މޮޔަކަމެއް ނޫން ބާ؟"
އޭނަ ވިދާޅުވީ އާޒިމާ މާލޭގެ މޭޔަރަކަށް އިންތިހާބު ނުވިޔަސް އޭނަ އަށް ގެއްލޭނެ އެއްޗެއް ނެތް ކަމަށެވެ.
"މިއަދު ވިޔަފާރި މިނިވަންކަމާއެކު ކުރެވޭނެ؟ ނޫން ނަމަ ބަލިވިޔަސް ހިބައިން ލިޔެވިފައި އޮތް ސިޔާސީ މަގާމެއް ކަށަވަރު،" ޖަމީލު ވިދާޅުވި އެވެ. "އެހެން ނަމަވެސް، މިއަދު ފެންނަން ހުރި ޙަގީގަތްތަކަށް ބަލާ އިރު، ސަރުކާރު ކެންޑިޑޭޓް މާލޭ މޭޔަރަކަށް ވުމީ ރައްޔިތުންނަށް ބޮޑު ގެއްލުމަކަށް ވާނެ ކަމެއްކަން ކަށަވަރު."
އާޒިމާގެ ކެމްޕޭން އިވެންޓެއްގައި ރައީސް ޑރ. މުހައްމަދު މުއިއްޒު އިއްޔެ ވިދާޅުވީ އިދިކޮޅު ކެންޑިޑޭޓަކަށް މާލޭގެ މޭޔަރުކަން ދީގެން މާލެ އަށް އަންނާނެ ކުރިއެރުމެއް ނެތް ކަމަށެވެ. އެހެންވެ ރިސްކެއް ނެގުމުގެ ބޭނުމެއް ނެތް ކަމަށާއި ރައްޔިތުން ވޯޓް ދޭންވީ އާޒިމާ އަށް ކަމަށް ވިދާޅުވި އެވެ.
އާޒިމާއާ އެކީ މޭޔަރު ކަމަށް ހަތަރު ކެންޑިޑޭޓަކު ވާދަކުރައްވަ އެވެ. އެއީ އެމްޑީޕީގެ ޓިކެޓްގައި ވާދަކުރައްވާ އާދަމް އާޒިމާއި ޑިމޮކްރެޓްސްގެ ޓިކެޓްގައި ވާދަކުރައްވާ ސައިފް ފާތިހުގެ އިތުރުން އަމިއްލަ ގޮތުން ވާދަކުރައްވާ ކުރީގެ ޕޮލިސް ކޮމިޝަނަރު ހުސައިން ވަހީދާއި އަމިއްލަ ގޮތުން ވާދަކުރައްވާ ޝުއައިބް އަލީ (ފުރަހަނި) އެވެ.
މޭޔަރު ހޮވަން ބާއްވާ ބައި-އިލެކްޝަން އޮންނާނީ މި މަހުގެ 13 ގަ އެވެ.
ޖަމީލު ވިދާޅުވީ މޭޔަރު ކަމަށް ވާދަކުރައްވާ ކެންޑޑޭޓުންގެ ތެރެއިން އެންމެ ގާބިލު ބޭފުޅަކީ ކުރީގެ ރައިސް އަބްދުﷲ ޔާމީން އިސްކޮށް ހުންނަވައިގެން އުފައްދަން މަސައްކަތްކުރައްވާ ޕާޓީ، ޕީޕަލްސް ނެޝަނަލް ފްރޮންޓް (ޕީއެންއެފް) އަށް ނިސްބަތްވާ ކުރީގެ ޕޮލިސް ކޮމިޝަނަރު ހުސައިން ވަހީދު ކަމަށެވެ.