ހުރަވީ ސްކޫލްގެ ޕްރިންސިޕަލްގެ މަގާމުގައި ހުންނެވި އަބްދުﷲ ރަޝީދު ލޯކަލް ގަވަރުމަންޓް މިނިސްޓްރީގެ ޕާމަނަންޓް ސެކްރެޓަރީއަކަށް އައްޔަންކޮށްފި އެވެ.
އޭނަ އެ މަގާމަގަށް ބަދަލުކުރެއްވި އިރު، އޭނަ އަކީ ކުރިން ވިލިމާލޭގެ މުޙްޔިއްދީން ސްކޫލާއި ތުލުސްދޫގައި ހުންނަ ކ. އަތޮޅު ތަޢުލީމީ މަރުކަޒާއި ތޮއްޑޫ ސްކޫލުގެ ޕްރިންސިޕަލެއްގެ މަގާމު ވެސް އަދާކުރެއްވި ބޭފުޅެކެވެ. އަދި ކ. އަތޮޅު މަދަރުސާގައި ހެޑްމާސްޓަރުކަމާއި ހެޑް އޮފް ސްކޫލްގެ މަގާމު ވެސް ރަޝީދު ފުރުއްވާފައިވެ އެވެ.
އޭނަ އަކީ އެޑިޔުކޭޝަނަލް މެނޭޖްމަންޓް އެންޑް އެޑްމިނިސްޓްރޭޝަންގެ ދާއިރާ އިން މެލޭޝިޔާގެ އޯޕަން ޔުނިޔަވަސިޓީ (ވިލާ ކޮލެޖް) އިން މާސްޓާސް ހައްދަވާފައި ބޭފުޅެކެވެ. ރަޝީދު ބެޗްލާސް ޑިގްރީ ހެއްދެވީ ހިސާބާއި އިނގިރޭސި ލޭންގުއޭޖުން، އިންޑިޔާގެ ކްރިސްޓް ޔުނިވަސިޓީންނެވެ. އަދި އިކޮނިމިކްސް، ޕޮލިޓިކަލް ސައިންސް އެންޑް ސޯސިއޮލޮޖީން ވެސް ބެޗްލާސް ޑިގްރީ ވެސް އެ ޔުނިވަސިޓީގައި ހެއްދެވި އެވެ.
މި ސަރުކާރުން ކުރިން ދާދި ފަހުން ވަނީ ޕްރިންސިޕަލުންގެ މަގާމުގައި ތިއްބެވި ބައެެއް ބޭފުޅުން ސިޔާސީ މަގާމުތަކަށް ބަދަލުކޮށްފަ އެވެ.