ބޭރު ޤައުމުތަކުގެ ވެރިންނަށް މަލާމާތްކޮށް ހުތުރު ބަހުން މުހާތަބު ކުރި ސިޔާސީ މީހުންނާއި މެދު ފިޔަވަޅު އަޅަން ފަސް ނުޖެހޭނެ ކަމަަށް ދިވެހި ސަރުކާރުން ބުނެފިއެވެ.
ފޮރިން މިނިސްޓްރީން ނެރުނު ބަޔާނުގައި ބުނެފައިވަނީ ބޭރުގެ ޤައުމުތަކުގެ ވެރިންނާއީ، މަތީ ފަންތީގެ ވެރިންނަށް އަމާޒުކޮށް ސޯޝަލް މީޑިއާގައި ކޮށްފައިވާ މަލާމާތާއި ހުތުރު ބަސްތައް ސަރުކާރަށް ފާހަގަ ވެފައިވާ ކަމަށެވެ. ނަމަވެސް އެއީ ސަރުކާރުގެ ރަސްމީ ސިޔާސަތެއް ނޫން ކަމަށާއި އެއީ، އެ ޚިޔާލު ފާޅުކުރި ބައެއްގެ އަމިއްލަ ޚިޔާލު ކަމަށް ވަނީ ބުނެފައެވެ.
ސަރުކާރުން ނެރުނު ބަޔާނުގައި، ޚިޔާލު ފާޅުކުރުމުގެ މިނިވަންކަން ޑިމޮކްރެޓިކް ހަމަތަކާއި އެކު ޖަވާބުދާރީ ވެވޭގޮތަށް ގެންގުޅެން ޖެހޭ ކަމަށް ޤަބޫލު ކުރާ ކަމަށް ވަނީ ބުނެފައެވެ. އަދި ބައިނަލްއަޤްވާމީ ގުޅުންތަކަށް ބުރޫއަރާގޮތަށް ނަފްރަތު ފަތުރައި އުފެދޭ ގޮތަށް ބޭނުން ނުކުރެވޭނެ ކަމަށް ވެސް ބަޔާނުގައިވެއެވެ.
ސަރުކާރުން މިފަދަ ގޮތަކަށް ބަޔާނެ ނެރުނުއިރު، އިންޑިއާއި ރާއްޖެ އާއި ދެމެދު މަސްރަހު ވަނީ ވަރަށް ބޮޑަށް ހޫނުވެފައެވެ. އެގޮތުން އިންޑިއާއިން ސޯޝަލް މީޑިއާގައި ރާއްޖެ ބޮއިކޮޓް ކުރުމަށް ބޮޑު ކެމްޕެއިނެއް ޖައްސަމުންދާއިރު، ރާއްޖޭގެ ނައިބު ދެ ވަޒީރެއް ބޮޑުވަޒީރު ނަރެންދްރަ މޯދީ އާއި ދިމާލަށް މަލާމާތް ރައްދުވާ ގޮތަށް ހުތުރުކޮށް އަމިއްލަ އެކައުންޓުތަކުން ޓްވީޓުތަކެއް ވަނީ ކޮށްފައެވެ.
މިއާއެކު އެ ދެވަޒީރުންގެ އިސްތިއުފާއަށް ގިނަ ބަޔަކު ދަނީ ސޯޝަލް މީޑިއާގައި އަޑު އުފުލަމުންނެވެ.