ސިޓީއެއްގެ ދަރަޖަ ދީފައި އޮތް ތިނަދޫ މީހުން އެހެން ރަށަކަށް ރަށްވެހިކަން ބަދަލުކުރާ ނަމަ އިދާރީ ފީއަކަށް 5،000ރ. ނަގަން ނިންމައިފި އެވެ.
ތިނަދޫ ކައުންސިލުން މި ގޮތަށް ނިންމީ މި މަހުގެ 4 ވަނަ ދުވަހު ބޭއްވި ޖަލްސާގަ އެވެ.
އެގޮތުން ރަށްވެހިކަން ބަދަލުކުރާ މީހުންގެ އަތުން 5،000ރ. ގެ އިދާރީ ފީއެއް މިއަދުން ފެށިގެން ނަގަން ނިންމުމާ ގުޅޭ ގޮތުން ކައުންސިލުން އާންމުކޮށްފައިވާ އިއުލާނެއްގައި ބުނީ އެގޮތަށް ނިންމި މައިގަނޑު ސަބަބަކީ ތިނަދޫގެ ރަށްވެހިން އެހެން ރަށްރަށަށް ބަދަލުވުމަކީ އެ ސިޓީގެ އާބާދީގެ ނިސްބަތަށް ނުރަނގަޅު އަސަރު ކުރާތީ ކަމަށެވެ.
އެހެންވެ މި ނިންމުމަކީ ތިނަދޫގެ އާބާދީ އިތުރު ކުރުމަށް ބާރަކަށް ވާނެ ކަމަށް ކައުންސިލުން ބުންޏެވެ.
ސިޓީއެއްގެ ސަރަޖަ ދެނީ އާބާދީ މަދުވެގެން 10،000 އަށް އަރާ ނަމަ އެވެ.
ހުވަދު އަތޮޅުން އެންމެ ފާހަގަކޮށްލެވޭ ރަށް ކަމަށްވާ ތިނަދު އަށް ސިޓީއެއްގެ ދަރަޖަ ދިނީ ކުރީގެ ރައީސް އިބްރާހީމް މުހައްމަދު ސޯލިހު، ވެރިކަމުގެ ދެވަނަ ދައުރަކަށް މިދިޔަ އަހަރު ކެމްޕޭން ކުރެއްވި އިރު، އޮގަސްޓް މަހުގެ ތެރޭގަ އެވެ.