ބޭރުގެ ވެރިންނަށް އަމާޒުކުރި ބަސްތައް ބަލަައި ނުގަނެވޭ ކަމަށް ފޮރިން މިނިސްޓަރ މޫސާ ޒަމީރު ވިދާޅުވެއްޖެއެވެ.
މިނިސްޓަރ ޒަމީރު މިހެން ވިދާޅުވެފައި މިވަނީ ރައީސް މުއިއްޒުއާއެކު ޗައިނާއަށް މިރޭ ފުރާވަޑައިގަންނެވިއިރު ކުރެއްވި އެކްސްގައި ކުރެއްވި ޕޯސްޓެއްގައެވެ. އިންޑިއާ ބޮޑުވަޒީރާއި ދިމާލަށް ސަރުކާރުގެ ނައިބު ވަޒީރަކު ސޯޝަލް މީޑިއާގައި މަލާމާތުގެ ބަސް ރައްދު ކުރުމުން، ސަރުކާރުން ޔޫތު މިނިސްޓްރީގެ 3 ނައިބު ވަޒީރެއް ސަސްޕެންޑް ކޮށްފައެވެ. އަދި އެއީ ސަރުކާރުގެ ރަސްމީ ސިޔާސަތު ނޫން ކަމަށް ބަޔާނަކުން ވަނީ ހާމަކޮށްފައެވެ.
މިނިސްޓަރ ޒަމީރުވެސް އެ މޭރުމުން އެކްސްގައި ކުރެއްވި ޕޯސްޓުގައި ވިދާޅުވީ، ބޭރުގެ ލީޑަރުންނާއި އަދި ގާތް އަވަށްޓެރިންނަށް އަމާޒުވި ބަސްތައް ބަލައި ނުގަނެވޭ ކަމަށާއި، ދިވެހި ސަރުކާރުގެ ރަސްމީ ސިޔާސަތު އެކަމުން ދައްކުވައި ނުދޭކަމަށެވެ. އަދި ގުޅިގެން ކުރިއަށް ދިއުމަށް ހުންނެވި ބިނާކުރަނިވި މަޝްވަރާތައް ކުރުމަށް ތައްޔާރަށް ސަރުކާރުން ތިބިކަން ހާމަކުރެއްވިއެވެ.
"އަޅުގަނޑުމެންގެ ހުރިހާ ބައިވެރިންނާ، ޚާއްޞަކޮށް އަޅުގަނޑުމެންގެ އަވަށްޓެރިންނާއެކު، ދެފަރާތުގެ އިޙްތިރާމާއި ވިސްނުންތެރިކަމުގެ މައްޗަށް ބިނާކޮށް، ހެޔޮ އަދި ބިނާކުރަނިވި މަޝްވަރާއެއް އުފެއްދުމަށް އަޅުގަނޑުމެން މިތިބީ " ޒަމީރު ވިދާޅުވިއެވެ.
އިންޑިއާގެ ބޮޑުވަޒީރަށް މަލާމާތް ރައްދުވާ ގޮތަށް ސަރުކާރުގެ ނައިބު ވަޒީރުންތަކެއް ޕޯސްޓުތަކެއް ކޮށްފައިވަނީ، ސޯޝަލް މީޑިއާއިގައި ރާއްޖެ ބޮއިކޮޓް ކުރަން ކެމްޕެއިނެއް ފެށިފައި ވަނިކޮށެވެ. އެއީ ލަކްޝަދީޕް ރައްތައް އިސްތިހާރު ކުރުމަށް ބޮޑު ވަޒީރު މޯދީ ކުރެއްވި ޕޯސްޓަކަށް ފަހު ފެށިގެން ދިޔަ ކެމްޕެއިނެކެވެ. އެއާއެކު ސަރުކާރުގެ ނައިބު ވަޒީރުންތަކެއްގެ ޕޯސްޓުތައް ކުރުމުން މައްސަލަ އިތުރަށް ގޯސްވެ، އެންމެ ފަހުން ބޮލީވުޑް ތަރިންވެސް ރާއްޖެ ބޮއިކޮޓް ކުރުމަށް ހިއްވަރު ދިނެވެ.