އިންޑިއާގެ ބޮޑުވަޒީރު ނަރެންދުރަ މޯދީއަށާއި އެ ގައުމަށް މަލާމާތްކޮށް ރާއްޖޭގެ ސަރުކާރަށް ނިސްބަތްވާ ބަޔަކު ސޯޝަލް މިޑިއާގައި ދެއްކި ވާހަކަތަކަކާ ގުޅިގެން އިންޑިއާގައި ހުންނަވާ ރާއްޖޭގެ ސަފީރު އިބްރާހީމް ޝަހީބު މިއަދު އިންޑިއާގެ ފޮރިން މިނިސްޓްރީ އަށް ހާޒިރިކޮށްފި އެވެ.
އޭނަ ހާޒިރުކުރީ ރާއްޖެ ގަޑިން ހެނދުނު 9:00 ގަ އެވެ.
ޝަހީބު ހާޒިރުކޮށް އޭނައާ ސުވާކޮށްފައިވާ އިރު، މިކަމާ ބެހޭ އިތުރު ތަފުސީލެއް އަދި ނުލިބެ އެވެ.
އާންމު ގޮތެއްގައި އެއް ގައުމުން އަނެއް ގައުމުގެ ސަފީރުން ހާޒިރުކޮށް ސުވާލު ކުރަނީ ދެ ގައުމުގެ މެދުގައި އުފެދޭ ސީރިއަސް މައްސަލަތަކާ ގުޅިގެން، ހިތްހަމަނުޖެހުން ފާޅުކުރުމުގެ ގޮތުންނެވެ.
ރައީސް ޑރ. މުހައްމަދު މުއިއްޒުގެ ސަރުކާރުގެ އިސް ވެރިންތަކެއް މޯދީއަށާއި އިންޑިއާ އަށް ކުޑައިމީސްކޮށް ސޯޝަލް މީޑިއާގައި ވާހަކަ ދެއްކެވީ މީގެ ހަތަރު ވަރަކަށް ދުވަސްކުރިން ލަކްޝަދީޕަށް މޯދީ ކުރެއްވިޮ ދަތުރުގެ ފޮޓޯތަކެއް ސޯޝަލް މީޑިއާގައި ޕޯސްޓްކުރުމުންނެވެ. އެގޮތުން އިންޑިއާގެ ވަރަށް ގިނަ ބަޔަކު އެ ޕޯސްޓާ ގުޅިގެން އިންޑިއާ މީހުން ޗުއްޓީ އަށް ރާއްޖެ ދާން ނުޖެހޭ ކަމަށާއި ލަކްޝަދީޕަކީ ރާއްޖެ އަށް ވުރެ ގުދުރަތީ ގޮތުން ރީތި ތަނެއް ކަމަށް ބުނެ، ރާއްޖޭގެ ޓޫރިޒަމް ބޮއިކޮޓްކުރަން ގޮވާފައިވެ އެވެ.
އެކަމާ ގުޅިގެން ސަރުކާރަށް ނިސްބަތްބާ ބޭފުޅުންތަކެއްގެ އިތުރުން ސަރުކާރަށް ތާއީދުކުރާ އެކި ފަރާތްތަކުން އިންޑިއާ އަށް މަލާމާތްކޮށް، ބަސްމަގު ހުތުރުކޮށް ސޯޝަލް މީޑިއާގައި ވާހަކަ ދައްކާފައިވެ އެވެ. އެކަމާ ގުޅިގެން ސަރުކާރުން މިހާރު ވަނީ ތިން ޑެޕިއުޓީ މިނިސްޓަރަކު ސަސްޕެންޑްކޮށްފަ އެވެ. އެއީ ޔޫތު މިނިސްޓްރީގެ ޑެޕިއުޓީން ކަމަށްވާ މަލްޝާ ޝަރީފާއި މަރިޔަމް ޝިއުނާގެ އިތުރުން އަބްދުﷲ މަހްޒޫމެވެ.