އިންޑިއާގެ ވިޔަފާރިވެރިންގެ ޖަމީއްޔާއަކުން އިންޑިއާގެ އެއާލައިންތައް ރާއްޖެއަށް ދަތުރު ކުރުން ހުއްޓާލުމަށް ގޮވާލައިފިއެވެ.
އިންޑިއާގެ ވިޔަފާރިވެރިންގެ ޖަމީއްޔާގެ އެވިއޭޝަން އެންޑް ޓުއަރިޒަމް ކޮމެޓީގެ ޗެއަރމަން ސޮއިކުރައްވައި ނެރުއްވި މި ބަޔާނުގައި، ވަނީ އިންޑިއާއިން ރާއްޖެއަށް އޮޕަރޭޓް ކުރާ ހުރިހާ އެއާލައިނަކުން ރާއްޖެއަށް ދަތުރުތައް ހުއްޓާލުމަށާއި، ލަކްޝަދީޕްގެ ރައްތަކަށް ދަތުރުތައް ޑައިވާޓް ކުރުމަށް އެދިފައެވެ. އަދި އިންޑިއާގެ ހޮޓެލް އެސޯސިއޭޝަނުން ލަކްޝަދީޕް ރާއްޖެ ދޫކޮށް ލަކްޝަދީޕް ރައްތަކަށް އިންވެސްޓް ކުރުމަށްވެސް ވަނީ ގޮވާލާފައެވެ.
މީގެ އިތުރުން މި ބާޔާނުގައި އިންޑިއާގެ ޓުއަރ އޮޕަރޭޓަރުންނާއި ޓްރެވެލް އޭޖެންޓުންގެ ޖަމީއްޔާތަކާއި އޭޖެންޓުނަށް ރާއްޖެ އިސްތިހާރު ކުރުން ހުއްޓާލުމަށްވެސް ވަނީ ގޮވާލާފައެވެ. އޭގެ ބަދަލުގައި އަންޑަމަން އައިލޭންޑްސް އާއި ލަކްޝަދީޕް ރައްތަކުގެ ޕްރޮމޯޓްކުރުމަށް ގޮވާލާފައިވެއެވެ. އަދި ސަރަހައްދުގެ އެހެން ޤައުމުތަކަށް ދާނަމަ، ލަންކާ، މޮރީޝަސް، ބާލީ އަދި ފުކެޓް ފަދަ ތަންތަން ޕްރޮމޯޓް ކުރުމަށް ވަނީ ގޮވާލާފައެވެ.
މި ބަޔާނުގައި މިގޮތަށް ގޮވާލާ ސަބަބެއް ގޮތުގައި ބުނެފައިވަނީ، ރާއްޖޭގެ މިނިސްޓަރުންތަކެއް އިންޑިއާއި ދެކޮޅު ޙިޔާލުތަކެއް ފާޅު ކުރާތީއެވެ. އަދި މިއީ އިންޑިއާ ރާޢްޖޭގެ އެންމެ ބޮޑު ސޯސް މާކެޓެއްވި ހިނދު ޢަމަލުކުރި ގޮތެއް ކަމަށް ބުނެ، އެންމެ ގިނަ ބޭރު ފައިސާ ވައްދާ ވަޒީފާ ފުރުސަތު ފަހިކޮށްދެނީވެސް އެ ޤައުމުކަމަށް ބުނެފައެވެ.
އިންޑިއާގެ ވިޔަފާރިވެރިންގެ ޖަމީއްޔާއަކުން މިފަދަ ބަޔާނެއް ނެރެފައިވާއިރު، އެންމެ އިންޑިއާގެ ބޮޑު ޓްރެވެލް އޭޖެންސީއެއް ކަމަށްވާ އީޒް މައި ޓްރިޕްއިންވެސް ވަނީ ރާއްޖެއަށް ބުކިންގް ހެދުން ހުއްޓާލިކަން އިއުލާންކޮށްފައެވެ.