ޗައިނާގައި ރާއްޖޭގެ ބިޒްނެސް ފޯރަމެއް މިއަދު ފަށައިފި އެވެ.
ތިންސަތޭކަށް ވުރެ ގިނަ ވިޔަފާރިތައް ބައިވެރިވާ މި ފޯރަމް ކުރިއަށް ދަނީ ރައީސް ޑރ. މުހައްމަދު މިހާރު ޗައިނާ އަށް ކުރައްވާ ދަތުރުގެ ތެރެއިން ފުޖިއަން ޕްރޮވިންސްގަ އެވެ.
ފޯރަމް ފެށުމުގެ ރަސްމިއްޔާތުގައި ރައީސް ވިދާޅުވީ ރާއްޖޭގެ ތަރައްގީއަށް ގެންގުޅުއްވާ ތަސައްވަރު ބިނާވެފައި ވަނީ ގިނަ ފަރާތްތަކާ އެކު ގުޅިގެން އުފެއްދޭ ހަރުދަނާ ގުޅުންތަކުގެ މައްޗަށް ކަމަށެވެ. އެ މަނިކުފާނު ވިދާޅުވި ގޮތުގައި ކުރިއަށް އޮތް 10-15 އަހަރަށް ބިނާކޮށް މި ސަރުކާރުގެ ތަރައްގީގެ އެޖެންޑާ ރާވާފައި ވަނީ ރާއްޖޭގެ އިގުތިސޯދު ސިންދަފާތުކޮށް، ޓޫރިޒަމް ފުޅާކޮށް، ތިމާވެށި ހިމާޔަތްކުރުމުގެ މައްޗަށެވެ.
އެގޮތުން ގާތްގަނޑަކަށް އަށް މަސް ތެރޭގައި 1،000 ހެކްޓަރުގެ ބިން ހިއްކައިގެން އީކޯ ފްރެންޑްލީ ސިޓީއެއްގެ ގޮތުގައި ރަސްމާލެ ތަރައްގީ ކުރަނީ 300،000 އަށް ވުރެ ގިނަ މީހުން އާބާދުކުރުމަށް ވިދާޅުވި އެވެ. އެހެންވެ އެތަނަކީ އުމްރާނީ ވަސީލާތްތަކާ އެކު ވިޔަފާރީގެ ގިނަ ފުރުސަތުތަކެއް ވަރަށް ބޮޑަށް ފަހިވާނެ ތަނެއް ކަމަށް ވިދާޅުވި އެވެ.
ރައީސް ވިދާޅުވީ އެ މަޝްރޫއުގެ ތެރެއިން، ސްޕެޝަލް އިކޮނޮމިކް ޒޯންތައް ކަނޑައެޅި، އެ ކަމަށް މިހާރު ވެސް 110 މެގަވޮޓުގެ އިޔާދަކުރަނިވި ހަކަތައިގެ ބިޔަ ޕްރޮޖެކްޓެއްގެ ޝައުގުވެރިކަން ލިބިފައިވާ ކަމަށެވެ. ރައީސް ފާހަގަކުރެއްވި ގޮތުގައި ޗައިނާ އާއި ރާއްޖެއާ ދެމެދު ސޮއިކޮށްފައި އޮތް މިނިވަން ވިޔަފާރީގެ އެއްބަސްވުމަށް ވަގުތުން އަމަލު ކުރަން ފަށަން ތައްޔާރަށް ހުންނެވި ކަމަށް ވިދާޅުވި އެވެ.
ރައީސް ވިދާޅުވީ ރާއްޖެ އަކީ ދެކުނު އޭޝިއާގެ ގައުމަކާ އެކު ޗައިނާ އިން މިނިވަން ވިޔަފާރީގެ އެއްބަސްވުމެއް ގާއިމުކުރި ފުރަތަމަ ގައުމަށްވުމަކީ ދެ ގައުމުގެ ދެމެދުގައި އޮތް ވަރުގަދަ ވިޔަފާރީގެ ގުޅުމުގެ ރަމްޒެއް ކަމަށާއި އެ އެއްބަސްވުމުގެ މަގުސަދަކީ ދެ ގައުމުގެ މެދުގައި ވިޔަފާރި ފުޅާކޮށް، ހާއްސަކޮށް ރާއްޖެ އުން ޗައިނާއަށް މަހުގެ ބާވަތްތައް އެކްސްޕޯޓު ކުރާ މިންވަރު އިތުރުކުރުމެވެ.
ރައީސް ވިދާޅުވި ގޮތުގައި ސަރުކާރުގެ ތަރައްގީގެ އަމާޒަކީ 2028 ވަނަ އަހަރާ ހަމައަށް، ރާއްޖޭގެ އުފެއްދުންތެރިކަން ދެ ގުނަކޮށް، 6 ބިލިއަނުން 12 ބިލިއަނަށް ޑޮލަރަށް އިތުރުކުރުމެވެ.
ބިޒްނެސް ފޯރަމާ ބެހޭ ގޮތުން އިކޮނޮމިކް މިނިސްޓަރު މުހައްމަދު ސައީދު ވިދާޅުވީ މީގެ ތެރެއިން އޭވިއޭޝަން، ޓްރެވެލް، ޓޫރިޒަމް، ރިއަލް އެސްޓޭޓް އަދި އިންޖިނިއަރިން އަދި ކާގޯ އެންޑް ލޮޖިސްޓިކްސްގެ ވިޔަފާރިތަކުން ބައިވެރިވާ ކަމަށެވެ. އަދި ރިނިއުބަލް އެނާޖީ އާއި ބޭންކިން އެންޑް ފައިނޭންސްގެ އިތުރުން ފިޝަރީޒް އެންޑް ޓްރޭޑްގެ ވިޔަފާރިތައް ވެސް ފޯރަމްގައ ބައިވެރިވެ އެވެ.