Last Updated: November 23, 09:08
Saturday, November 23, 2024
ރިޕޯޓް

ރާއްޖެ އިސްތިހާރުކުރަން ދިވެހިން މީސްމީޑއާ ފުރާލައިފި

1
އައްޑޫގެ ފަޅުރަށްތަކެއް. ފޮޓޯ/ އަލީ ނާސިރު

ދިވެހި ރާއްޖޭގެ ފަތުރުވެރިކަމަކީ ހަމައެކަނި ވަކި ބަޔަކު ޕްރޮމޯޓްކޮށްގެން މިހާ ހިސާބަށް ގެނައި ސިނާޢަތެއް ނޫނެވެ. މިއީ ވޭތުވެ ދިޔަ 50 އަހަރު ތެރޭ އެތައް ބައެއްގެ ބުރަ މިންނެތް މަސައްކަތުގެ ނަތީޖާއެވެ. ރާއްޖޭގެ ފަތުރުވެރިކަން ކިލަނބުކޮށްލަން މީގެ ކުރިންވެސް މަސައްކަތްތަކެއް ބަޔަކު ކޮށްފައި އެބަހުއްޓެވެ.

ނަމަވެސް ޤައުމެއްގެ ބަޔަކު ރާވައިގެ ބޮޑު އެންޓި ކެމްޕެއިނެއް މިގޮތަށް ޖެއްސި ކަމެއް އެނގޭކަށް ނެތެވެ. ޖައްސާފައި ހުރީ ސިޔާސީ ގޮތުން ފައިދާއެއް ހޯދަން ޖައްސާފައި ހުރި ކެމްޕެއިންތަކެކެވެ. އޭގެ އިތުރުން ދެން ހުރީ ބަޔަކު ކޮށްފައިވާ ގޯސްކަމެއްގެ ސަބަބުން ލިބުނު "ލައްގަނޑު" ތަކެވެ. ނަމަވެސް މިފަހަރު 50 އަހަރުން ހޯދި ރީތި ނަން ހަޑިކޮށްލުމުގައި ސަރުކާރުގެ ވަޒީރު ފެންވަރުގައި ތިބި ބައެއްގެ ހިމެނުމަކީ ހިތާމަ ކުރަން ޖެހޭ ކަމެވެ. ބައެއްގެ ރޭވުންތެރި ކަމުގެ މަޅީގައި ނޭނގި ނަމަވެސް ޖެހިގެން ދިޔައީއެވެ.

މިއާއެކު ވޭތުވެ ދިޔަ 2-3 ދުވަހަކު ބަޔަކު މިވަނީ މި ސިނާޢަތާއި ދިމާކޮށްލާފައެވެ. އަދި އިޤްތިޞާދު ފުނޑާލުމަށް ރާވައިގެން ކެމްޕެއިންތަކެއް އެބަކުރެއެވެ. މިކަން ކުރަނީ ރޭވިގެންނޭ ބުނަން ޖެހޭ ސަބަބަކީ، ސަރުކާރުގެ ތިން ނައިބު ވަޒީރެއް އެއްޗެކޭ ކިއުމުގެ ކުރިންވެސް ކެމްޕެއިންނެއް ފެށިފައި އޮތުމެވެ. ނަމުގައި އަޅުވަނީ ތިމަންމެންގެ ވަޒަން ޕްރޮމޯޓް ކުރުމެވެ. އެކަމަކު ބޭނުން ކުރަނީ ބޮއިކޮޓް ކުރުމުގެ ހޭޝްޓެގްތަކެވެ.


މިހުރިހާ ކަމެއްގެ ތެރެއިންވެސް، އަލިކަމެއް ވެސް ފެނިދާނެތާއެވެ. އަޅުގަނޑު ސޯޝަލް މީޑިއާއަށް ވަދެ ބަލާލިއިރު، ދިވެހިން ދަނީ އެކި ރަށްރަށުގެ މަންޒުތައް ސޯޝަލް މީޑިއާއަށް ދޫކުރަމުންނެވެ. ރާއްޖޭގެ ޤުދުރަތީ ރީތިކަން، ދިވެހި ސޯޝަލް މީޑިއާ ފުރާލައިފިއެވެ. އެބަޔަކު ލަނީ އެބައެއްގެ ރަށުގެ މަންޒަރުތަކެވެ. ނޫނީ ދަތުރު ކޮށްފައިވާ ސަރަހައްދެއްގެ މަންޒަރުތައްވެސް އެބަލައެވެ. ބައެއް މީހުން ރާއްޖޭގެ ޕްރޮމޯޝަނަލް ބޭނުމަށް ރިސޯޓުތަކުން ނަގާފައިވާ މަންޒަރުތައްވެސް ވިޒިޓް މޯލްޑިވްސް ހޭޝްޓެގާއި އެކު ދޫކުރަމުންނެވެ.


ސަރުކާރަށް ތާޢިދު ކުރާ ފަރާތްތަކުން ފޮޓޯތައް ސޯޝަލް މީޑިއާގައި ފުރަތަމަ ދޫކޮށްލަން ފެށި ނަމަވެސް، މިހާރު އެއަށް ވުރެ ބޮޑު ޓްރެންޑަކަށް މިކަން މިވަނީ ވެފައެވެ. ވަކި ޕާޓީއެއް ވަކި ފިކުރެއް ނެތި އެންމެން ދަނީ އެއް ހަމައެއްގައި ދިވެހި ޤައުމު ދުނިޔެއަށް އިސްތިހާރު ކޮށްދެމުންނެވެ.


ދިވެހި ފަތުރުވެރި ސިނާޢަތާއި ބަޔަކު ދިމާކޮށްލިއަސް ފާއިތުވި ތިން 4 އަހަރު ދުނިޔޭގެ އެންމެ މަޤުބޫލު މަންޒިލުގެ ލަޤަބު ހޯދީ ކިހިނެތް ކަން ދިވެހި އެބަދައްކައެވެ. ދިވެހިން މިސާލު ދައްކަނީ މަދު ބައެއްގެ ޢަމަލަކީ މުޅި ދިވެހި ރާއްޖެ ނޫން ކަމެވެ. ދިވެހިން އެކަތި ގަނޑެއް ގޮތުގައި ދައްކުވައިދެނީ ދިވެހިން ފަދަ ރީދި ގޮނޑުދޮށްތަކެއް މަދުން އޮތަސް، މި ބްރޭންޑް މާ ވަރުގަދަ ކަމެވެ. މި ބްރޭންޑުން ދޭ ޚިދުމަތަކީ ދުނިޔޭގެ އެހެން ބަޔަކަށް އެއާއި އެއްހަމަކޮށް ނުލެވޭނެ އެއްޗެއް ގޮތުގައެވެ.


ގައިމުވެސް ދިވެހި ޤައުމު ޕްރޮމޯޓް ކުރަންތިބީ ދިވެހިން ނޫން ވަކި ކޮންބައެއް ހެއްޔެވެ. އަޅުގަނޑުމެން ރާއްޖެ ސޯޝަލް މީޑިއާގައި ފުރާލަން ޖެހެއެވެ. ބަޔަކަށް ރައްދު ދޭނެ ކަމެއް ނެތެވެ. ދިވެހިން ދައްކުވާދޭންވީ ދިވެހިން ދިވެހި ޤައުމަކީ ވަކި ބައެއްގެ ދަށު ނުވާނެ ޤައުމެއް ކަމެވެ.