ރާއްޖޭގައި އިތުރު 15 އެއާޕޯޓް ހަދަން ނިންމާފައިވާ ކަމަށް ސަރުކާރުން ބުނެފި އެވެ.
މިކަން އިއުލާންކޮށްފައި ވަނީ ރައީސް ޑރ. މުހައްމަދު މުއިއްޒު މިހާރު ޗައިނާ އަށް ކުރައްވަމުން ގެންދަވާ ދަތުރުގެ ތެރެއިން އިއްޔެ ބެއްވި ބިޒްނެސް ފޯރަމްގަ އެވެ. އޭގައި މިކަން އިއުލާންކޮށް ބުނެފައި ވަނީ އެއާޕޯޓްތައް ތަރައްގީކޮށް ދޭން ޝައުގުވެރިވާ ފަރާތްތަކަށް އެ ފުރުސަތު ހުޅުވާލާފައިވާ ކަމަށެވެ.
ނަމަވެސް އެއީ ކޮންކޮން އެއާޕޯޓްތަކެއް ކަމެއް ސަރުކާރުން ހާމައެއްނުކުރެ އެވެ.
ރާއްޖޭގައި މިހާރު ވެސް ޖުމްލަ 18 އެއާޕޯޓް އެބައޮތެވެ. އަދި އެއާޕޯޓްތަކެއް ތަރައްގީކުރުމުގެ މަޝްރޫއުތަކެއް މިހާރު ވެސް ކުރިއަށް އެބަދެ އެވެ. ސަރުކާރުން ދާދި ފަހުން ވަނީ ފ. ނިލަންދޫގައި ވެސް އެއާޕޯޓެއް ތަރައްގީ ކުރަން ނިންމައިފަ އެވެ.
ބިޒްނެސް ފޯރަމްގެ ތެރޭގައި ވަނީ 11 މަޝްރޫއަކަށް އިންވެސްޓަރުން ހޯދަން ހުޅުވާލައިފަ އެވެ. އޭގެ ތެރޭގައި އައްޑޫ ބްރިޖާއި ކާޑެއްދޫ އާއި ތިނަދޫ ގުޅުވާލުމުގެ މަޝްރޫޢު އާއި، އިހަވަންދިއްޕޮޅު ތަރައްޤީކުރުމާއި އިއާދަކުރަނިވި ހަކަތައިގެ ދާއިރާ އާއި، ދަތުރުފަތުރުގެ ދާއިރާގެ މަޝްރޫޢޫތައް ހިމެނެ އެވެ.