އައްޑޫ ހުޅުމީދު އާއި ހިތަދޫ ގުލައިލަން އަޅަން ނިންމާފައިވާ ބްރިޖް މަޝްރޫ އަށް މިހާރު ވަރަށް ކުންފުނިތަކުން ޝައުގުވެރިކަން ފާޅުކުރަމުން އަންނަ ކަމަށާއި ކުންފުންޏަކުން މިހާރު ޕްރޮޕޯސަލެއް ވެސް ހުށަހަޅާފައިވާ ކަމަށް އިންފްރާސްޓަރަކްޗަ މިނިސްޓަރު ޑރ. އަބްދުﷲ މުއްތަލިބު ވިދާޅުވެއްޖެ އެވެ.
ޗައިނާގައި އިއްޔެ ބޭއްވި ރާއްޖޭގެ "އިންވެސްޓް މޯލްޑިވްސް ފޯރަމް" ގެ ހަވާސާގެ ތެރެއިން ދައުލަތުގެ މީޑިއާ، ޕީއެސްއެމަށް މިނިސްޓަރު ވިދާޅުވީ ފޯރަމްގެ ތެރޭގައި ވެސް ކުންފުނިތަކުން އައްޑޫ ބްރިޖް މަޝްރޫއަށް ޝަޢުގުވެރިކަން ފާޅުކޮށްފައިވާ ކަމަށެވެ. އެގޮތުން މިހާރު ވެސް ކުންފުންޏަކުން ޕްރޮޕޯސަލް ހުށައަޅާފައިވާ ކަމަށް ވިދާޅުވި އެވެ.
"މިހާރު އެ ޕްރޮޕޯސަލް އިވެލުއޭޓްކުރަމުން މި ގެންދަނީ އަޅުގަނޑުމެންނަށް އެންމެ ރަނގަޅު އަދި ކުރިއަށްގެން ދެވޭނެ ގޮތެއް ބަލަން،" މުއްތަލިބު ވިދާޅުވި އެވެ. "ހަމައެއާއެކީ މިކަމަށް ޗައިނާގެ ބޮޑެތި ކުންފުނިތަކުން އެބަހުރި ޝައުގުވެރިކަން ފާޅުކޮށްފައި."
އައްޑޫ ބްރިޖަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެކެވެ. އެގޮތުން އެ މަނިކުފާނުގެ "ހަފުތާ 14" ނުވަތަ ވެރިކަމުގެ ފުރަތަމަ 100 ދުވަހުގެ ތެރޭގައި ބްރިޖާ ގުޅުން ހުރި މުހިއްމު ކަންތައްތަކެއް ރާވާފައިވެ އެވެ. އެގޮތުން މިވަގުތު އެންމެ އިސްކަމެއް ދީފައި ވަނީ ބްރިޖުގެ ޑިޒައިނާ އެކީ ފީސިބިލިޓީ ސްޓަޑީއެއް ހެދުމުވެ.
ސަރުކާރުން ބުނެފައި ވަނީ "ހަފުތާ 14" ގެ ތެރޭގައި ދިރާސާތައް ނިންމައިލެވޭނެ ކަމަށެވެ.
މިނިސްޓަރު ވިދާޅުވި ގޮތުގައި ބްރިޖްގެ ޢަމަލީ މަސައްކަތް ފެށުމަށްޓަކައި ފީޒިބިލިޓީ އާއި ޑިޒައިންގެ މަސައްކަތް ކުރުމަށް ވަރަށް އަވަހަށް ބަޔަކާ ހަވާލު ވެސް ކުރެވޭނެ އެވެ.
އައްޑޫ ބްރިޖަކީ "އިންވެސްޓް މޯލްޑިވްސް ފޯރަމް" ގައި އިންސްވެސްޓަރުން ހޯދަން ރާއްޖެ އިން ހުޅުވައިލި 11 މަޝްރޫއުގެ ތެރޭގައި ހިމެނޭ އެއް މަޝްރޫއު ވެސް މެ އެވެ.