އިންޑިއާގެ ފިލްމް ސެންސަރު ބޯޑް ސެންޓްރަލް ބޯޑް އޮފް ފިލްމް ސަޓިފިކޭޝަން (ސީބީއެފްސީ) މިހާރު ސިފަވަމުން ދަނީ އަފްއާނިސްތާނުގައި ހަރަކާތްތެރިވާ ހައްދުފަހަނައަޅާފައިވާ ތާލިބާނުން ގޮތަށް ކަމަށާއި އެ ބޯޑް ހަރަކާތްތެރި ވަނީ ވެސް ތާލިބާނުން ގޮތަށް ކަމަށް ބުނެ ބޮލީވުޑްގެ މަޝްހޫރު ޑައިރެކްޓަރު ވިޝާލް ބަރަދްވާޖް ސެންސަރު ބޯޑަށް ބަހުގެ ހަމަލާތަކެއް ދީފި އެވެ.
އެކަމަކު މިއީ ހަމައެކަނި ވިޝާލްގެ ވިސްނުން ހުރި ގޮތެއް ނޫނެވެ.
ބޮލީވުޑްގެ އެތައް ޑައިރެކްޓަރުންނާއި ޕްރޮޑިއުސަރުންނާއި އެކްޓަރުން ވެސް، އިންޑިއާގައި ސެންސަރު ކުރަން ގެންގުޅޭ މިންގަނޑުތަކާ ދޭތެރޭ އަބަދު ވެސް ވަރަށް ފާޅުކަން ބޮޑުކޮށް ހިޔާލު ފާޅު ކުރަމުން ގެންދެ އެވެ.
ވިޝާލް ބުނީ ސެންސަރު ބޯޑުން އެ މީހުންގެ ފިލްމްތައް ބޭނުންހާ ގޮތަކަށް، ބޭނުންހާ މިންވަރަށް ކޮށަން ދޫކޮށްލެވިގެން ނުވާނެ ކަމަށެވެ. އަދި ސެންސަރު ބޯޑްގައި ތިބި މީހުން "ކޮށާލަން" ޖެހޭ ހިސާބަށް ކަންތައްތައް މިހާރު ގޮސްފައިވާ ކަމަށް "ހައިދަރް" އާއި "އޮމްކާރާ" ފަދަ ފިލްމުތައް ގެނެސް ދީފައިވާ ޑައިރެކްޓަރު ބުންޏެވެ.
ފިލްމް އިންޑަސްޓްރީން ގަބޫލް ކުރާ ގޮތުގައި 21 ވަނަ ގަރުނުގައި ވެސް އިންޑިއާގެ ސެންސަރު ބޯޑް މަސައްކަތް ކުރަނީ "އަންޒަމާނުގެ" ވިސްނުމުގަ އެވެ. އެ ސަބަބާ ހެދި ކޮންމެ ކޮންެމެ ކަހަލަ ފިލްމެއް ހެދޭކަށް ނެތެވެ. ހެދިޔަސް އެ ފިލްމް އޮތް ގޮތަށް އެޅުވޭކަށް ނެތެވެ.
ސެންސަރު ބޯޑުން ކޮށައިމަށައިގެން ފިލްމެއް ސިނަމާތަކާ ހަމައަށް އަންނަ އިރު، އޭގައި ބަލާނެ އެއްޗެއް ގިނަ ފަހަރަށް ނޯންނާނެ ކަމަށް ބުނެ ފިލްމީ ދާއިރާގެ ވަރަށް ގިނަ ބަޔަކު އަންނަނީ ފާޑު ކިޔަމުންނެވެ.
އިންޑިއާއަކީ މިހާރު ވަރަށް ޒާތްޒާތުގެ ކޮންޓެންޓް ހިމެނޭ ފިލްމްތައް އުފައްދާ ގައުމެކެވެ.
ފިލްމް އިންޑަސްޓްރީގެ ވިސްނުމާއި އޯޑިއަންސްގެ ރަހަތައް ވެސް މިހާރު މި ވަނީ ބަދަލުވެގެން ގޮސްފަ އެވެ. އެކަމަކު ބަދަލު ނުވާ އެއް ކަމަކީ ސެންސަރު ބޯޑްގެ ބޯދާ ހިޔާލެވެ.
މި ސަބަބާ ހުރެ ވަރަށް އާދައިގެ މަންޒަރުތައް ވެސް ފިލްމުތަކުން ކަނޑާލަން ޖެހުމަކީ ވަރަށް އާންމު ކަމެވެ.
މިސާލަކަށް އެއީ ދުންފަތުގެ އިސްތިއުމާލް ކުރާ މަންޒަރަކަށް ވިޔަސް، ލޯބީގެ މަންޒަރަކަށް ވިޔަސް އަދި ބޭނުންކޮށްފައި ހުންނަ ބަހުރުވައަކުން ވެސް ނުވަަތަ ފިލްމަށް ކިޔާ ނަމަކުން ވެސް އެ ފިލްމެއް ސެންސަރު ބޯޑްގެ ކަތުރުގެ ތޫނުކަން ދައްކާލައިފައި ނޫނީ އެއަށް ސެޓްފިކެޓް ލިބޭ ވަރެއް ނުވެ އެވެ.
މި މައްސަލާގައި އެކި ފަހަރުމަތުން ބޮލީވުޑުން ވަނީ ކަމާ ބެހޭ ފަރާތްތަކާ އެކު މަޝްވަރާ ވެސް ކޮށްފަ އެވެ.
މިދިޔަ ހަފުތާގައި ވެސް އިންޑިއާގެ އިންފޮމޭޝަން އެންޑް ބްރޯޑްކާސްޓިން މިނިސްޓަރާ ވެސް ބައްދަލުކޮށް، ސީބީއެފްސީން ކުރިމަތި ކުރާ މައްސަލަތަކަށް ހައްލެއް ހޯދައި ދޭން އެދިފައިވެ އެވެ.
ފިލްމް އިންޑަސްޓްރީގެ ގިނަ ބަޔަކު ގަބޫލް ކުރާ ގޮތުގައި އިންޑިއާގެ ފިލްމުތަކަކީ މިހާރު ހަމައެކަނި އިންޑިއާގެ އޯޑިއަންސަށް އަމާޒު ކުރެވޭ ފިލްމުތަކެއް ނޫނެވެ. މި އިންޑަސްޓްރީގެ ނުފޫޒު މުޅި ދުނިޔޭގައި ވެސް މިހާރު ވަރަށް ގަދަ އެވެ.
އެހެންވެ އިންޓަނެޝަނަލް އޯޑިއަންސް ވެސް ގަބޫލް ކުރާ ފެންވަރުގެ ފިލްމްތަކެއް ކުރިއަށް އޮތް ތަނުގައި ވެސް ހެދެން އޮތީ އިންޑިއާގެ ސެންސަރު ބޯޑަށް ގެނެވޭ އިސްލާހަކުންނެވެ.
ކަތުރު ތޫނުކޮށްގެން ތިބެ ކޮށައި މަށައި، ކްލެސިފައިކޮށް ސެޓްފިކްޓެއް ފިލްމަކަށް ދިނުމަކުން މިކަމަށް އަންނާނެ ހައްލެއް ނެތެވެ.
ޒަމާނީ ވިސްނުމުގެ، ޒުވާން ހިޔާލުތަކުގެ ވެރިންނަށް ސެންސަރު ބޯޑުން ވަނީ ފުރުސަތު ދޭން ޖެހިފަ އެވެ.
އެމެރިކާގައި އޮންނަ ފަދަ އުސޫލެއް އިންޑިއާ އިން ބޭނުން ވިޔަސް، "ނާތަހުޒީބް" ސިކުނޑިތަކެއް ސެންސަރު ބޯޑް ހައިޖެކްކޮށްގެން ތިބޭ ނަމަ، އިންޑިއާގެ ފިލްމް އިންޑަސްޓްރީ އަށް އަންނާނެ ކުރިއެރުމެއް ނެތެވެ.
ޑައިރެކްޓަރު ވިޝާލެކޭ އެއްގޮތަށް މުޅި ފިލްމް އިންޑަސްޓްރީ ވެސް ދެކެނީ އެހެންނެވެ.