ދިރާގު ޕޭއި ޚިދުމަތް ކުރިއަށް ގެންދިއުމަށް "ދިރާގު ފިންޓެކް" ނަމުގައި ދިރާގުގެ ސަބްސިޑިއަރީ ކުންފުޏެއް ދިރާގުން ރެޖިސްޓަރ ކޮށްފިއެވެ.
މިކަމާއިގ ގުޅޭގޮތުން ދިރާގުން ބުނެފައިވަނީ، ޤައުމީ ޕޭއިމެންޓް ނިޒާމުގެ ޤާނޫނުގެ ދަށުން މާލީ ޚިދުމަތް ދިނުމުގެ ލައިސެންސް މޯލްޑިވްސް މަނިޓަރީ އޮތޯރިޓީން މިހާރު ދެވޭނީ އެކަމަށް ހާއްސަ ކުންފުންޏެއްގެ ދަށުން ރެޖިސްޓަރކޮށްގެން ކަމަށް އެމްއެމްއޭއިން ކަނޑައަޅާފައިވާ ކަމަށެވެ. މިއާއެކު ދިރާގު ޕޭއި ޚިދުމަތް ކުރިއަށް ގެންދިއުމަށް ދިރާގު ފިންޓެކް ޕްރައިވެޓް ލިމިޓެޑްގެ ނަމުގައި ކުންފުންޏެއް މިދިޔަ ޑިސެމްބަރު މަހުގެ 31 ވަނަ ދުވަހު ރެޖިސްޓަރ ކޮށްފައިވާ ކަމަށް އެކުންފުނިން ބުނެއެވެ.
މިކުންފުނިން މައިގަނޑު ޚިދުމަތްތަކަކީ ދިރާގު ޕޭއި މެދުވެރިކޮށް ދޭ އީ ވޮލެޓް ޚިދުމަތްތައް ކުރިއަށް ގެންދިއުމެވެ. އެގޮތުން އީ ވޮލެޓަކީ ބޭންކް އެކައުންޓަށް ވޮލެޓަށް ފައިސާ ޖަމާ ކޮށްގެން އެ ވޮލެޓް މެދުވެރިކޮށް ވިޔަފާރި ކުރުމާއި އަދި ބިލުތައް ދެކުމާއި ސަރުކާރުގެ ބައެއް ޚިދުމަތްތައްވެސް އެ މެދުވެރިކޮށް ފައިސާ ދެއްކޭ ޚިދުމަތެކެވެ. ކުންފުނީގެ އޮޕަރޭޝަން ފެށުމަށް ދިރާގުން ލަފާ ކުރަނީ މިއަހަރު އެޕްރީލް މަހު 13 ވަނަ ދުވަހުއެވެ.
ކުންފުނި އުފައްދާފައިވާ ކެޕިޓަލް އަކީ 40 މިލިއަން ރުފިޔާއެވެ. އަދި އާންމު ހިއްސާގެ ގޮތުގައި ކަނޑައަޅާފައިވަނީ 16 މިލިއަނެވެ. އެއީ ހިއްސާއެއް 2.50ރ. އަށް އަގުކޮށްފައެވެ. ކުންފުނީގެ މައިގަނޑު ހިއްސާދާރަކީ މައި ކުންފުނި ދިރާގެވެ. ކުންފުނީގެ ބޯޑުގައި 5 ބޭފުޅުން ހިމެނޭއިރު، ކުންފުނީގެ މެނޭޖިންގް ޑިރެކްޓަރަކަށް ހަމަޖައްސައްފައިވަނީ އަލީ ރިޔާޒެވެ. އަދި ދިރާގުގެ މިހާރުގެ ސީއީއޯ އަދި މެނޭޖިންގް ޑިރެކްޓަރ އިސްމާއިލް ރަޝީދުވެސް ކުންފުނީގެ ބޯޑުގައި ހިމެނިވަޑައިގަންނަވައެވެ.
ދިރާގުން ބުނެފައިވަނީ މިހާރު ކުންފުނީގެ ކުރިއަށް ގެންދާނީ އިދާރީ މަސައްކަތްތައް ކަމަށާއި މިއީ، ދިރާގުގެ މަލީ ޚިިދުމަތްތައް ފުޅާ ކުރުމަށް މުހިންމު ފިޔަވަޅަކަށް ވެގެން ދާނެ ކަމަށެވެ.