ފުލުހުންގެ އަސާސީ ތަމްރީނު ކުރުމުގެ 36 ބެޗް އައްޑޫގައި ފަށައިފި އެވެ.
މިދިޔަ ހޯމަ ދުވަހު ނެޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްޓްމަންޓުގައި ފެށި މި ތަމްރީން ކޯސް އިފުތިތާހުކޮށް ދެއްވައި ޝަރަފުވެރިކޮށް ދެއްވީ އެތަނުގެ ޑިރެކްޓަރ އެސިސްޓެންޓް ކޮމިޝަނަ އޮފް ޕޮލިސް ޔޫނުސް ސޮބާހެވެ.
ސޯޅަ ހަފުތާގެ މުއްދަތައް ކުރިއަށް ގެންދާ މި ތަމްރީނު ކޯހުގައި ޖުމްލަ 198 ފުލުހަކު ބައިވެރިވެ އެވެ. އެއީ 48 އަންހެން ފުލުހުންނާއި 150 ފިރެހެން ފުލުހެކެވެ.
މި ކޯހުގައި ފިޒިކަލް ޓްރެއިނިން، އޮޕަރޭޝަނަލް ސޭފްޓީ އެންޑް ޓެކްޓިކްސް، ގާނޫނާއި ގަވާއިދުތަކުގެ އިތުރުން ފުލުހުންގެ މަސައްކަތްތަކާ ގުޅުން ހުރި ގިނަ މޮޑިއުލްތަކެއް ކިޔަވައިދޭނެ އެވެ.
އައްޑޫ ޕޮލިސް މާޗް 27، 2022 ގައި ހުޅުވި ފަހުން ފުލުހުންގެ އަސާސީ ތަމްރީނު ބެޗްގެ ޓްރެއިނިންތައް އެ ތަނުގައި އަންނަނީ ބާއްވަމުންނެވެ.