ރާއްޖޭގެ ފިލްމީ ތަރި އަހުމަދު އަޒްމީލް (އަޒޭ) މަސްތުވާތަކެތީގެ މައްސަލައެއްގައި ހައްޔަރުކޮށްފި އެވެެ.
އެނގިފައިވާ ގޮތުގައި މަސްތުވާތަކެއްޗާ އެކީ އޭނަ ރޭ ހައްޔަރުކުރީ ވިލިމާލޭގައި ދިރިއުޅޭ އެޕާޓްމަންޓުން އިތުރު މީހަކާ އެކީގަ އެވެ.
މިކަމާ ގުޅޭ ފުލުހުން މިއަދު ބުނީ ވިލިމާލޭގައި މަސްތުވާތަކެތީގެ ވިޔަފާރިކުރާ ކަމަށް ފުލުހުންގެ އިންޓެލިޖެންސަށް ލިބުނު މައުލޫމާތަކާ ގުޅިގެން ރޭގެ ވަގުތެއްގައި ހިންގި އޮޕަރޭޝަނެއްގައި ކޯޓް އަމުރެއްގެ ދަށުން 40 އަހަރުގެ ފިރިހެނަކާއި 41 އަހަރުގެ ފިރިހެނަކު ހައްޔަރުކޮށްފައިވާ ކަމަށެވެ. އަދި އެ މީހުން ތިބި ފްލެޓް ބަލައި ފާސްކުރި އިރު މަސްތުވާތަކެތި ކަމަށް ޝައްކު ކުރެވޭ އެއްޗެއް ހުރި ފަސް ރަބަރު ޕެކެޓާއި މަސްތުވާތަކެތި ބަންދު ކުރުމަށް ބޭނުންކުރާ ސާމާނު ވެސް ފެނިފައިވާ ކަމަށް ފުލުހުން ބުންޏެވެ.
މި މައްސަލައާ ގުޅިގެން ހައްޔަރުކުރި 40 އަހަރުގެ މީހާގެ ބަންދަށް 15 ދުވަސް އަދި 41 އަހަރުގެ މީހާ އަށް ޝަރުތުތަކެއް ކުރުމަށް ފަހު ކޯޓުން ދޫކޮށްލާފައިވާ ކަމަށް ފުލުހުން ބުންޏެވެ.
އަޒޭ މަސްތުވާތަކެތީގެ މައްސަލައެއްގައި ހައްޔަރުކުރި އިރު އޭނަގެ މިފަދަ މައްސަލައެއް ކުރިން ފެންމަތިވެފައެއް ނުވެ އެވެ. އަޒޭ އަކީ މަޝްހޫރު ބަތަލާ އައިޝަތު ރިޝްމީގެ ކުރީގެ ފިރިމީހާ އެވެ. އެ ދެ މީހުންނަށް ފިރިހެން ދަރިޔަކު ވެސް ލިބިފައިވެ އެވެ.
އަޒޭ އަކީ ވީޑިއޯ ލަވަތަކުން އާންމުންގެ ސަމާލުކަން ލިބުނު އެކްޓަރެކެވެ. އޭނަ ފިލްމުތަކާއި ޓީވީ ޑްރާމަތާއި ވެބް ސީރީޒްތަކުން ވެސް ފެނިފައިވެ އެވެ.
ބައިސްކޯފުން މިހާރު ގެނެސްދޭ ރިޝްމީގެ "ޔާރާ" ގައި ވެސް އަޒޭ ހިމެނެ އެވެ.