ދޮންއަދަރާދަ ހިނގުން ހުޅުވުމުގެ މަސައްކަތުގެ ތެރެއިން މިހާތަނަށް ގާތްގަނޑަކަށް ދެބައި ކުޅަ އެއްބައި މަސައްކަތް ނިމިފައިވާ ކަމަށް ސްޓެލްކޯއިން ހާމަކޮށްފިއެވެ.
މިމަސައްކަތް ކުރިއަށްދާ ގޮތް ނޫސްވެރިންނާއި މިއަދު ސްޓެލްކޯއިން ހިއްސާކޮށް، އެކަމާއި ބެހޭ މައުމޫލާތު އެކުންފުނިން ވަނީ ދީފައެވެ. އެކުންފުނީގެ މެނޭޖިންގް ޑިރެކްޓަރ ހުސެއިން ފަހުމީ ވިދާޅުވި ގޮތުގައި މިމަސައްކަތަކީ ފަސޭހަ މަސައްކަތެއް ނޫން ކަމަށެވެ. އެގޮތުން އެ މަގު ބަންދުކޮށް އެތަނުގައި 2 އިންޖީނެއް ހިންގަމުންދިޔަކަން އޭނާ ފާހަގަ ކުރެއްވިއެވެ. އެއީ 1.5 މެގަވޯޓުގެ 2 އިންޖީނެވެ. ފަހުމީ ވިދާޅުވީ އެ ދެ އިންޖީނު ރޫޅައިގެން ގެންދަނީ އެހެން ރަށަކަށް ކަމަށެވެ.
މިތަނުން އިންޖީނު ނެގުމަށް ފަހު އެންމެ އުނދަގޫ މަސައްކަތަކީ ކިންޖީނު ބަހައްޓާފައި ހުރި ކޮންކްރީޓް ބެޑު ނެގުމުގެ މަސައްކަތްކަން ފާހަގަކޮށް އޭނާ ވިދާޅުވީ އެމަސައްކަތް 3 ފަރާތަކާއި ހަވާލުކޮށްވެސް ނުވި ކަމަށެވެ. ގާތްގަނޑަކަށް 6 ފޫޓު އަޑިއަށް ކޮންކްރީޓް ބެޑު ހަދާފައި ހުރިއިރު، މިހާރު އެ ބެޑް ނެގުމުގެ މަސައްކަތް ކުރަނީ އެމްޓީސީސީން ކަމަށް ވިދާޅުވިއެވެ.
މަގު ހުޅުވުމުގެ ގާތްގަނޑަކަށް މިހާރު 40 އިންސައްތައް ނިމިފައިވާކަން ފާހަގަކޮށް ފަހުމީ ވަނީ ކޮންކްރީޓް މަސައްކަތް ނިމުމުން ފާރު ރާނައި މަގު ހުޅުވާލެވޭނެ ކަމަށެވެ. އަދި ދޮން އަދަރާދަ މަގު ހުޅޫވާލައި މަގު ދެކޮޅަށް އޮތް ސްޓެލްކޯ ދެބިން ގުޅާލުމަށް ވިސްނާފައިވާ ކަމަށް ފަހުމީ ވިދާޅުވިއެވެ.
"އަޅުގަނޑުމެން މަސައްކަތްތައް ހުންނަ ގޮތުން އެ ދޭތެރެއިން ކޭބަލް ޓްރާންސްފަރ ކޮށް މަސައްކަތް ފަށާފިއްޔާ ދުއްވާ އެއްޗިއްސަށް ނޫނީ ހިނގާ މީހުންނަށް ދަތިވެދާނެ. އެހެންވީމަ އަޅުގަނޑުމެން މި ގަސްތުކުރަނީ އަޅުގަނޑުމެންނަށް މަތިން ހިނގާބިނގާ އުޅެވޭނެ ގޮތަށް ދަތިނުވާނެހެން އަދި ފަޔަރ ލޮރިއެއްވެސް ދަތުރު ކުރަން ވެއްޖެއިއްޔާ އުނދަގޫ ނުވާނެހެން ބްރިޖެއް އަޅަން. ބްރިޖެއް އަޅާފަ ދެ ބިން ގުޅާލަން. " ފަހުމީ ވިދާޅުވިއެވެ.
ސްޓެލްކޯއިން ފާހަގަ ކުރި ގޮތުގައި ދޮންއަދަރާދަ މަގު ބަނދުކޮށް އެތަނުގައި އެއްކޮށް 17 އިންޖީނެއް ކުރީގައި ވަނީ ބެހެއްޓިފައެވެ. ނަމަވެސް މިހާރު ހުޅުމާލެއަށް އިންޖީނުތައް ބަދަލުކޮށް ޚިދުމަތް ދޭން ފެށުމާއެކު އެ ސަރަހައްދުގެ ރައްޔިތުންނަށް އަޑުގަދަވެގެން ދުމުގެ އަސަރުކޮށްގެންވެސް އުނދަގުނުވާ ކަމަށް ވިދާޅުވިއެވެ.
ސްޓެލްކޯއިން މަސައްކަތް ކުރަނީ ދޮންއަދަރާދަ މަގުގެ މަސައްކަތް އެއްކޮށް ނިންމައި ރޯދައަށް ހުޅުވާލުމަށެވެ. މިމަގުގެ ބަންދު ކުރީ 2010 ވަނަ އަހަރު މާލޭގެ ކަރަންޓު ކެޕޭސިޓީ އިތުރުކުރުމަށް ހިންގަން ރާވާފައިވާ ޕްރޮޖެކްޓް ލަސްވުމުން އެކަމަށް ހައްލެއް ހޯދުމަށެވެ.