ވެލާނާ އެއާޕޯޓަށް މިހާތަނަށް އެއްދުވަހުގެ ތެރޭގައި އެންމެ ގިނަ އެއާޓްރެފިކް މޫވްމެންޓް ރެކޯޑު ކުރެވިފައި ވަނީ މިިދިޔަ ހޮނިހިރު ދުވަހު ކަމަށް އެމްއޭސީއެލްއިން ހާމަކޮށްފިއެވެ.
އެގޮތުން އެއާޕޯޓުން އެދުވަހު ވީލްބޭސް އަދި އޮޕަރޭޝަންތަކާއި ސީޕްލޭން އޮޕަރޭޝަންތައް ހިމަނައިގެން ޖުމްލަ 925 އެއާޓްރެފިކް މޫވްމެންޓް ވަނީ ރެކޯޑުކޮށްފައެވެ. އެއީ މީގެ ކުރިން މިދިޔަ އަހަރު ހަދާފައިވާ ރެކޯޑާއި 861 މޫވްމެންޓަށް ވުރެ ބޮޑުތަނުން އިތުރު އަދަދެކެވެ.
އެމްއޭސީއެލްގެ އިން ހޮނިހިރު ދުވަހު 925 މޫވްމެންޓް ހެދިއިރު އޭގެ ތެރޭގައި ހިމެނެނީ
- 672 ސީޕްލޭން މޫވްމެންޓް
- 104 ވީލްބޭސް އިންޓަނޭޝަނަލް މޫވްމެންޓް
- 116 ޑޮމެސްޓިކް މޫވްމެންޓް
- 33 އަމިއްލަ ޖެޓުތަކުގެ މޫވްމެންޓް
އެމްއޭސީއެލްއިން އިން ޖުމްލަ އެއާ ޓްރެެފިކް މޫވްމެންޓް ރިކޯޑެއް 6 ވަނަ ދުވަހު ހެދިއިރު، އޭގެ ކުރިން މިމަހުގެ 2 ވަނަ ދުވަހުގެ ވަނީ ސީޕްލޭން ދަތުރުތަކުގެ ރެކޯޑެއް ޤާއިމްކޮށްފައެވެ. އެގޮތުން އެދުވަހު 649 ސީޕްލޭން މޫވްމެންޓް ހެދިއެވެ. ނަމަވެސް 6 ވަނަ ދުވަހު އެ ރެކޯޑުވެސް ވަނީ ބިންދާލާފައި ކަމަށް އެމްއޭސީއެލްގެ ތަފާސް ހިސާބުތަކުން ދައްކައެވެ.
ވެލާނާ އެއާޕޯޓަކީ ރާއްޖޭގެ އިޤްތިޞާދީ މައި ދޮރާއްޓެވެ. އެގޮތުން ދުވަހު ދުވަހަށް ވެލާނާ އެއާޕޯޓަށް ޖައްސާ ފްލައިޓުތައް އިތުރުވަމުންދާއިރު، އެއާޕޯޓުގެ އައު ޓާމިނަލާއެކު ޚިދުމަތް ދިނުމަށް ބޮޑެތި ފަސޭހަތަކެއް ލިބިގެން ދާނެ ކަމަށް އެމްއޭސީއެލްއިން ޤަބޫލު ކުރެއެވެ. ސަރުކާރުން މިހާރު ދަނީ މިއަހަރުގެ ޕީކް ސީޒަނަށް އެއާޕޯޓް ނިންމުމުގެ މަސައްކަތް ކުރަމުންނެވެ.