އަންނަ މަހުގެ 11 ވަނަ ދުވަހުން ފެށިގެން ސީދާ އައްޑޫ ސިޓީ ކައުންސިލްގެ ބެލުމުގެ ދަށުން ކުނި ނެގުމުގެ މަސައްކަތް ފަށާ އިރު، ހުރިހާ އަވަށްތަކުގެ ގޭބިސީތަކުން ކުނި ނެގުމުގެ ހިދުމަތަށް ރަޖިސްޓްރީ ކުރަން ޖެހޭނެ ކަމަށް ކައުންސިލުން ބުނެފި އެވެ.
މޭޔަރު އަބްދުﷲ ސޯދިގް (ސޯބެ) މިއަދު ވިދާޅުވީ އަވަށްތަކުގެ ހުރިހާ ގޭބިސީތަކުން ކުންޏަށް ރަޖިސްްޓްރީ ކުރުމަކީ މަޖުބޫރު ކަމެއް ކަމަށެވެ. އަދި އެކަން އެގޮތަށް ކުރަން ޖެހެނީ ސަބަބުތަކާ ހެދި ކަމަށް ވިދާޅުވި އެވެ.
ރަޖިސްޓްރޭޝަން ފޯމް މިހާރު އަވަށު އޮފީސްތަކުން އަންނަނީ ދޫކުރަމުންނެވެ.
ކައުންސިލުން މި މަަސައްކަތް ފަށަން ނިންމީ ކުނި ނެެގުމުގެ މަސައްކަތް މިހާރު ހަވާލުކޮށްފައި އޮންނަ ސަދަން މޯލްޑިވްސްގެ އެގްރިމަންޓް އަންނަ މަހުގެ 10 އަށް ހަމަވާތީ އެވެ.
"ބައެއް އަވަށްތަކުގައި މީހުން ދިރިއުޅޭ އަށްސޭތަކައެއްހާ ގޭބިސީ ހުރި އިރު، އޭގެ ތެރެއިްނ ދެބައިކުޅަ އެއްބައި ގޭބިސީތަކުން އެބަ ހުރި މިހާރު އޮތް ނިޒާމްގައި ވެސް ރަޖިސްޓްރީ ނުކޮށް. އޭގެ މާނައަކީ އެ ފަރާތްތަކުން ކުނި އުކާނީ އެ ރަށެއްގެ އެކި ތަންތަނަށޭ،" މޭޔަރު ވިދާޅުވި އެވެ. "އެހެންވެ ފުރަތަމަ ކަަމަކަށް އެބަ ޖެހޭ މިކަން ހުއްްޓުވަން. ކުނީގެ މައްސަލައަކީ ސީރިއަސްކޮށް އެންމެން ވެސް ނަގަން ޖެހޭ މައްސަލައެއް. ކުނި އުކައި ދިނުމުގެ ހިދުމަތްދޭ އިރު، އޭގެ ބޭނުން ނުހިފައި ހިތަށް އެރި ތާކަށް ކުނި އުކަމުން ދިއުމަކީ ވަރަށް ބޮޑު މައްސަލައެއް."
މޭޔަރު ވިދާޅުވީ މި މައްސަލަ އެންމެ ބޮޑީ އައްޑޫގެ ގުޅިފައިވާ ރަށްތަކުގައި ކަމަށެވެ.
އެގޮތުން ލިންކް ރޯޑްގައި ހުންނަ ގެތަކާއި އެ މަގާ ކައިރި ސަރަހައްދުތަކުގައި ހުންނަ ގޭބިސީތަކުން މޫދަށް ކުނި އުކާކަން ވަރަށް ބޮޑަށް ފާހަގަ ކުރެވޭ ކަމަށް ވިދާޅުވި އެވެ.
ސޯބެ ވިދާޅުވީ ކައުންސިލްގެ ބެލުމުގެ ދަށުން ކުނި ނެގުމުގެ މަސައްކަތް ކުރާ އިރު، އެންމެ މަދުވެގެން ހަފުތާއަކު ދެ ފަހަރު ގޭބިސީތަކުން ކުނި ނަގާނެ ކަމަށެވެ. އަދި ކުނި ނަގާ އިރު އެކަން ކުރާނީ ކުނިވާ ޒާތުގެ ތަކެއްޗާއި އެ ނޫން ތަކެތި ވަކިކޮށްގެން ވަކި އުސޫލެއްގެ ދަށުން ކަމަށް ވިދާޅުވި އެވެ.
މި މަސައްކަތް ކައުންސިލުން ބުނާ ގޮތަށް ކޮށްދޭނެ ފަރާތެއް ހޯދަން ވެސް މިހާރު ވަނީ އިއުލާންކޮށްފަ އެވެ.
"މިކަަމަށް ޝައުގުވެރިވާ ފަރާތްތަކަށް ކުރިމަތި ލެވިދާނެ ވަކި އަވަށަކުން ކުނި ނަގައި ދިނުމަށް ވެސް. ނުވަތަ ހުރިހާ އަވަށަކުން ވެސް ކުނި ނަގައި ދިނުމުގެ މަސައްކަތަށް ވެސް،" ސޯބެ ވިދާޅުވި އެވެ.