ޗައިނާގެ ޓޫރިސްޓުން ރާއްޖެ ގެނައުން އިތުރު ކުރުމަށްޓަކައި އެ ގައުމުން ރާއްޖެ އަށް ކުރާ ދަތުރުތައް އިތުރުކޮށް، އިތުރު އެއާލައިންތަކެއް ގެންނަން މަޝްވަރާ ކުރަމުން އަންނަ ކަމަށް ޓޫރިޒަމް މިނިސްޓަރު އިބްރާހީމް ފައިސަލް ވިދާޅުވެއްޖެ އެވެ.
ރައީސް ޑރ. މުހައްމަދު މުއިއްޒާ އެކީ މިހާރު ޗައިނާ އަށް ކުރައްވަމުން ގެންދަވާ ދަތުރުގެ ތެރެއިން މީޑިއާތަކާ ވާހަކަ ދައްކަވަމުން މިނިސްޓަރު ވިދާޅުވީ ރާއްޖޭގެ މިހާރު އެންމެ ބޮޑު އަމާޒަކީ ރާއްޖޭގެ އެއްވަނަ މާކެޓަކަށް ޗައިނާ ހެދުން ކަމަށެވެ. އެގޮތުން އެ ގައުމުން މިހާރު ރާއްޖެ އަށް ދަތުރުތައް ބާއްވާ އެއާލައިންތަކުގެ ދަަތުރުތައް އިތުރުކޮށް، އިތުރު އެއާލައިންތައް ގެނައުމާ ގެނައުމާ ގުޅޭ މަޝްވަރާތައް ޗައިނާގެ ކަމާބެހޭ ފަރާތްތަކީ މިހާރު ކުރިއަށްދާ ކަމަށް ފައިސަލް ވިދާޅުވި އެވެ.
"އިރާދަކުރެއްވިއްޔާ އަޅުގަނޑަށް ޤަބޫލުކުރެވެނީ މިކުރާ މަސައްކަތުގެ ނަތީޖާ ވަރަށް ރަނގަޅުވާނެ ކަމަށް،" މިނިސްޓަރު ވިދާޅުވި އެވެ. "އަދި ޗައިނާ އަކީ ރާއްޖެ އަށް އެންމެ ގިނައިން ފަތުރުވެރިން އަންނަ ޑެސްޓިނޭޝަނަށް ވެގެންދާނެ ކަމަށް."
މި މަހުގެ 8 އާ ހަމައަށް ޗައިނާ އިން ރާއްޖެ އަށް 1،676 ޓޫރިސްޓުން އައިސްފައިވެ އެވެ. ޗައިނާ އަކީ މިދިޔަ އަހަރު ތިން ވަނަ އަށް ރާއްޖެ އަށް އެންމެ ގިނަ ޓޫރިސްޓުން އައި ގައުމެކެވެ. ކޮވިޑްގެ ކުރިން އެ ގައުމަކީ ރާއްޖޭގެ އެއްވަނަ މާކެޓެވެ.
އެ މަގާމަށް ޗައިނާ އަލުން އަންނަން އެދިވަޑައިގަންނަވާ ކަމަށް ރައީސް މުއިއްޒު ވެސް ޗައިނާގައި ވިދާޅުވި އެވެ.
ރާއްޖޭގެ މި އަހަރުގެ ޓާގެޓަކީ މަދުވެގެން 2 މިލިއަން ޓޫރިސްޓުން ގެނައުމެވެ.
ޗައިނާ އެއްވަނަ މާކެޓަށް ސަރުކާރުން އަމާޒު ހިފާފައި މި ވަނީ މިދިޔަ އަހަރު އެންމެ ގިނަ ޓޫރިސްޓުން އައި އިންޑިއާ އިން މިހާރު ރާއްޖެ ބޮއިކޮޓްކުރަން ކެމްޕޭންތަކެއް ފަށާފައި ވަނިކޮށެވެ.