ފޭކް ޑޮލަރުތައް ދައުރުވަމުންދާތީ އެކަމަށް ސަމާލުކަން ދޭން ފުލުހުން އިލްތިމާސްކޮށްފި އެވެ.
ފުލުހުން ބުނީ މިހާރަކަށް އައިސް 100، 50 އަދި 20 ގެ ޑޮލަރުގެ ފޭކް ނޫޓުތަކެއް ދައުރުވަމުންދާކަން ފާހަގަކުރެވިފައި ކަމަށެވެ. އަދި އެފަދަ ޑޮލަރު ބޭނުންކޮށްގެން އެކި ތަންތަނުން ވިޔަފާރީގެ މުއާމަލާތްތައް ކޮށްފައިވާ މައްސަލަތަކެއް ވެސް ފުލުހުންނަށް ހުށަހެޅި ދަނީ ތަހުގީގު ކުރަމުން އަންނަ ކަމަށް ވެސް ބުންޏެވެ.
ފުލުހުން ބުނީ ސައްހަ ނޫން ޑޮލަރު ބޭނުންކޮށްގެން ވިޔަފާރިކޮށްފައިވާ މައްސަލައަކާ ގުޅިގެން ތުހުމަތުކުރެވޭ 57 އަހަރުގެ ދިވެހި ފިރިހެނަކު ހައްޔަރުކޮށް އެ މައްސަލަ ވެސް މިހާރު ބަލަމުން އަންނަ ކަމަށެވެ.
"ސައްހަ ނޫން ޑޮލަރުގެ ނޫޓްތަކެއް ދައުރު ވަމުންދާތީ، މިހާރަށް ވުރެ ބޮޑަށް ސަމާލުކަން ދެއްވައި، ޑޮލަރު މުއާމަލާތްކުރައްވާ އިރު ޑޮލަރުގެ ސައްހަކަން ކަށަވަރުކުރުމަށް ފަހު ނޫނީ ޑޮލަރުގެ މުއާމަލާތް ނުކުރެވުމަށްވެސް އިލްތިމާސްކުރަން." ފުލުހުން ބުންޏެވެ.
މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ވެސް ދާދި ފަހުން ޑޮލަރުގެ ފޭކް ނޫޓްތައް ދައުރުވާތީ އެކަމަށް ސަމާލުވާން އިލްތިމާސްކޮށްފައިވެ އެވެ.