އަރިދަފުސް ރޯގާ ފެތުރެމުންދާތީ އެކަމަށް ސަމާލުވުމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އިލްތިމާސްކޮށްފި އެވެ.
އެޗްޕީއޭ އިން މިއަދު އާންމުކުރި ތަފާސްހިސާބުތަކުން ދައްކާ ގޮތުގައި މިދިޔަ ނޮވެމްބަރު މަހާ އަޅާ ބަލާއިރު އަރިދަފުސް ރޯގާ ޖެހޭ މިންވަރު ވަނީ އިތުރުވެފަ އެވެ. ނޮވެމްބަރު މަހު އަރިދަފުސް ރޯގާ ޖެހިގެން 30410 ކޭސް ރިޕޯޓު ކޮށްފައިވާއިރު މިދިޔަ މަހު އެ އަދަދު ވަނީ 31،225 އަށް އިތުރުވެފަ އެވެ.
މިދިޔަ މަހު 194 މީހަކަށް ޑެންގީ ހުން ޖެހިފައިވާ ކަމަށް މި ތަފާސްހިސާބުތަކުން ދައްކަ އެވެ.
އަރިދަފުސް ރިޕޯޓުކުރާ މިންވަރު އިތުރުވަމުން އަންނާތީ އެޗްޕީއޭއިން ވަނީ ކެއްސާ، ކިނބިހި އަޅާއިރު އަނގަޔާ ނޭފަތް ޓިޝޫއަކުން ނިވާކުރުމަށް އިލްތިމާސްކޮށްފަ އެވެ. ނިވާކުރުމަށް ޓިޝޫއެއް ނެތްނަމަ، މުލައްދަނޑިން އަނގަޔާ ނޭފަތް ނިވާވާގޮތަށް ހުރަސް ކުރުމަށާއި ބޭނުންކުރާ ޓިޝޫ ކުނި ވަށިގަނޑަށް އެއްލައިލުމަށް ވެސް ވަނީ އިލްތިމާސްކޮށްފަ އެވެ.
ހަމައެއާއެކު ހުން އައިސް ކެއްސާނަމަ މީހުން އެއްވެ އުޅޭ ތަންތަނަށް ނުދިއުމަށް ވެސް އެޗްޕީއޭއިން އިސްތިމާސް ކުރެ އެވެ.