އުރީދޫން މާސްޓަކާޑާ ގުޅިގެން ރާއްޖެއަށް ޒިޔާރަތްކުރާ ޓޫރިސްޓުންގެ ތަޖުރިބާ އިތުރަށް ފުރިހަމަކޮށް، އިތުރު ފަސޭހަތަކާއި ހާއްސަ ކަންތައް ދޭން، ސްޓްރެޓީޖިކް ޕާޓްނާޝިޕް އެއްބަސްވުމެއްގައި ސޮއިކޮށްފި އެވެ.
މިއެއްބަސްވުމުގައި ސޮއިކުރިކަން އުރީދޫން އިއުލާން ކުރީ އުރީދޫ މޯލްޑިވްސްގެ ހެޑްކުއާޓާސްގައި މާސްޓަ ކާޑުގެ ދެކުނު އޭޝިއާގެ ޗީފް އޮޕަރޭޓިން އޮފިސަރު ވިކާސް ވަރްމާ އަދި ކުންފުނީގެ ކަންޓްރީ މެނޭޖަރު، ސްރީ ލަންކާ އަދި މޯލްޑިވްސް، ސަންދުން ހަޕުގޯޑާ އަދި އުރީދޫ މޯލްޑިވްސްގެ ސީއީއޯ ހާލިދު އަލް ހަމާދީ އާއެކު ބޭއްވުނު ބައްދަލުވުމެއްގަ އެވެ.
ޚާލިދު ވިދާޅުވީ މާސްޓަކާޑާ އެކީ ވެވުނު އެއްބަސްވުމަކީ ވެސް ކަސްޓަމަރުންނަށް ދެވޭ ހިދުމަތްތަކުގެ ފެންވަރު ރަނގަޅުކުރުމަށް ކުރަމުންދާ މަސައްކަތުގެ މުހިއްމު ބައެއް ކަމަށެވެ.
"އަޅުގަނޑުމެންގެ ކަސްޓަމަރުން އަދި މާސްޓަ ކާޑު ގެންގުޅޭ ފަރާތްތަކަށް ހާއްސަ އެތައް ކަމެއް ކުރިއަށް އޮތް ތަނުގައި ތައާރަފުކުރެވިގެން ދާނެ." އޭނަ ވިދާޅުވި އެވެ.
މާސްޓަކާޑްގެ ފަރާތުން ވިކާސް ވިދާޅުވީ އެ ކުންފުންޏާއި ރާއްޖެއަށް ޒިޔާރަތްކުރާ މާސްޓަކާޑު ބޭނުންކުރާ ޓޫރިސްޓުންނަށް ހާއްސަ އޮފާތަކެއް ހުޅުވައިލާނެ ކަމަށެވެ. އަދި މާސްޓަކާޑު ބޭނުންކުރާ ޓޫރިސްޓުންނަށް އުރީދޫގެ ހައި ސްޕީޑް ޑޭޓާ ބޭނުންކުރުމުގެ މަގު ތަނަވަސްވެ، އިތުރު ފައިދާތަކެއް ލިބޭނެ ކަމަށް ވިދާޅުވި އެވެ.
"މާސްޓަކާޑު ބޭނުންކުރާ ފަރާތްތަކަށް ދުނިޔޭގެ އެކި ކަންކޮޅުތަކުގައި ހާއްސަ ކަންތައްތައް ހޯދައި ދިނުމަށްޓަކައި އަޅުގަނޑުމެން އަބަދުވެސް މި އަންނަނީ މަސައްކަތްކުރަމުން." ވިކާސް ވިދާޅުވި އެވެ.
މާސްޓަކާޑާއި އުރީދޫ މޯލްޑިވްސް އިން ބުނީ ދެ ކުންފުނީގެ އެއްބަސްވުމުގެ އަމާޒަކީ ވެސް ކަސްޓަމަރުންނަށް އިތުރު ފަސޭހަތަކެއް ހޯދައި ދިނުން ކަމަށެވެ.