ތިނަދޫ ސިޓީގެ އިތުރު ދެ ސްކޫލެއްގައި ގްރޭޑް 10 އާ ހަމައަށް ކިޔަވައި ދޭން އެޑިއުކޭޝަން މިނިސްޓްރީގައިގައި އެދެން ނިންމައިފި އެވެ.
ތިނަދޫ ކައުންސިލުން ބުނީ އެ ސްކޫލަކީ އަބޫބަކުރު ސްކޫލާއި ތިނަދޫ ސްކޫލް ކަމަށެވެ. މި ދެ ސްކޫލްގައި މިހާރު ކިޔަވައި ދެނީ ކީ ސްޓޭޖން ފެށިގެން ގްރޭޑް 6 އާ ހަމައަށެވެ. ތިނަދޫގައި ހުންނ ގދ. އަތޮޅު ތައުލީމީ މަރުކަޒުގައި ގްރޭޑް 7-12 އަށް ކިޔަވައިިދެ އެވެ.
ތިނަދޫ ކައުންސިލުން ބުނީ އަބޫބަކުރު ސްކޫލާއި ތިނަދޫ ސްކޫލްގައި ގްރޭޑް 10 އާ ހަމައަށް ކިޔަވައި ދިނުމުގެ އިންތިޒާމު ހަމަޖައްޒައި ދޭން އެޑިއުކޭޝަންގައި އެދެން ނިންމީ އެ ދެ ސްކޫލްގެ ބެލެނިވެރިން އެކަމަށް ވަރަށް ބޮޑަށް އެދެމުންދާތީ އެވެެ. އަދި ކުރީގެ ސަރުކާރުގައި އެޑިއުކޭޝަން މިނިސްޓްރީއާ މިކަން ހިއްސާ ކުރުމުން މި އަހަރުގެ ތެރޭގައި އެ ބަދަލު ގެނެސްދޭނެކަމުގެ އިޝާރާތެއް ވެސް ދީފައިވާ ކަމަށް ކައުންސިލުން ބުންޏެވެ.
ތިނަދޫ ސްކޫލުގައި 430 ދަރިވަރަކު ކިޔަވަމުންދާ އިރު، އަބޫބަކުރު ސްކޫލުގައި 400 އަށްވުރެ ގިނަ ދަރިވަރުން ކިޔަވަ އެވެ. އަދި ގދ. އަތޮޅު ތައުލީމީ މަރުކަޒުގައި 500 އެއްހާ ދަރިވަރުން ކިޔަވަ އެވެ.