މާލޭގެ މަގުތަކުގައި ފެން ބޮޑުވުމާއި ގުޅިގެން، މަގުތަކުން ފެން ހިނދެންދެން މަގުތަކުގައި ބަރު އުޅަނދު ނުދުއްވުމަށް ފުލުހުން އިލްތިމާސްކޮށްފިއެވެ.
މިކަމާއި ގުޅިގެން ފުލުހުން ބުނީ، މިހާރު ކުރަމުންދާ ވިއްސާރައިގައި މާލޭ މަގުތަކުގައި ފެންބޮޑުވެފައިވާއިރު، ބައެއް ގޭގެއަށް ފެން ވަނުމުގެ ހާދިސާތައް ހިނގަމުންދާ ކަމަށެވެ. މިއާއެކު މަގުތަކުން ފެން ހިންދާ އާންމު ހާލަތަށް މަގުތައް އަންނަންދެން ބަރު އުޅަނދުތަކާއި، ހަތަރު ފުރޮޅުލީ އުޅަނދު ޒަރޫރީ ބޭނުންތަކުގައި ނޫނީ ނުދުއްވުމަށް އަންގާ ކަމަށެވެ.
މާލޭ މަގުތަކުގައި ފެން ބޮޑުވެގެން ފެން ހިންދުމުގެ މަސައްކަތް އެމްއެންޑީއެފް އިން ކުރަމުންދާއިރު، މިހާތަނަށް 18692 ޓަނުގެ ފެން ޕަމްޕް ކުރެވިފައިވާ ކަމަށް އެމްއެންޑީއެފްއިން ބުނެއެވެ. އަދިވެސް ފެން ހިންދުމުގެ މަސައްކަތް އެމްއެންޑީއެފްއިން ދަނީ ކުރަމުންނެވެ.
މީގެ އިތުރުން މަގުތަކުގައި ފެން ބޮޑުވުމުން ގޭގެއަށް ފެން ވަންނަމުންދާތީވެ، މިހާތަނަށް 46 ގެއެއްގައި ވެލި ބަސްތާ ޖަހާފައިވާ ކަމަށް އެމްއެންޑީއެފްއިން ބުނެއެވެ.
އެންޑީއެމްއޭއިން މިރޭ ބުނީ، ފެން ބޮޑުވުމުގެ ސަބަބުން 57 މީހުން ވަގުތީ ހިޔާއަށް ބަދަލުކޮށްފައިވާ ކަމަށާއި، މާލޭގެ 144 އެހީތެރިކަމަށް އެދިފައިވާ ކަމަށެވެ. މިފަހަކަށް އައިސް ބޯކޮށް ވާރޭ ވޭހޭ ދުވަސްވަރު މާލޭގައި އަބަދުވެސް ފެން ބޮޑުވެއެވެ.