ބޮލީވުޑްގެ އެކްޓަރު ޝާހިދު ކަަޕޫރު މި އަހަރުގެ ޖެނުއަރީ މަހުގެ 14 ވަނަ ދުވަހު އެންގޭޖްވެފައިވާ ކަމަށާއި އޭނާގެ ލޯބިވެރިޔާއަކީ މީރާ ރާޖްޕުޓް ކިޔާ ނިއުދިއްލީގެ އަންހެން ކުއްޖެއް ކަމަށް އިންޑިއާގެ ނޫސްތަކުން ރިޕޯޓްކޮށްފި އެވެ.
މީރާއަކީ ނިއުދިއްލީގެ ލޭޑީ ޝްރީީ ރާމް ކޮލެޖް ފޮ ވިމެން (އެލްއެސްއާރް) ގައި އިންގްލިޝް އޮނާ އަށް ކިޔަވަމުން އަންނަ ދަރިވަރެކެވެ.
އޭނާއަކީ ބޮލީވުޑާ އެއްވެސް ވަރެއްގެ ގުޅުމެއް އޮތް ކުއްޖެއް ނޫން ކަމަށް ވެސް މީޑިއާތަކުން ބުނެފައިވެ އެވެ.
ބޮލީވުޑްގެ ހަބަރުތައް ގެނެސްދޭ ބައެއް ނޫސްތަކުން ބުނެފައިވާ ގޮތުގައި ކުރިން ކަރީނާ ކަޕޫރާ ރައްޓެހިވެގެން އުޅުނު އުމުރުން މިހާރު 34 އަހަރުގެ ޝާހިދާއި މީރާ ދިމާވީ ދިއްލީގައި އޮތް ދީނީ ހަފުލާއެއްގެ ތެރެއިންނެވެ.
އޭގެ ފަހުން ދެ މީހުންގެ ދެމެދުގައި ގުޅުން ބަދަހިވެ، ޝާހިދު މީރާ އަށް ލޯބި ހުށަހެޅީ ކަމަށްވެ އެވެ. އަދި ދެ މީހުން މިހާރު އެންގޭޖްވެފައިވާތީ ވަރަށް އަވަހަށް ކައިވެނި ކުރަން ވެސް ހަމަޖެހިފައިވާ ކަމަށް މީޑިއާތަކުން ބުނެފައިވެ އެވެ.
މިކަމާ ބެހޭ ގޮތުން ވާހަކަ ދެއްކުމަށް ޝާހިދުގެ ބައްޕަ އެކްޓަރު ޕަންކަޖް ކަޕޫރު، މީރާގެ އާއިލާ އާ ވެސް ބައްދަލުކޮށްފައިވާ ކަމަށްވެ އެވެ.
މިދިޔަ އަހަރު ރިލީޒްވި "ހައިދަރް" ކުޅެގެން އެންމެ މޮޅު އެކްޓަރުގެ އެވޯޑް ވެސް ހާސިލްކޮށްފައިވާ ޝާހިދާއި ކަރީނާ ވަކިވި ފަހުން ޕްރިޔަންކާ ޗޯޕްޅާ އާ ވެސް އޭނާ ރައްޓެހިވި ކަމަށް އަޑުތައް ފެތުރިފައިވެ އެވެ.
މިދިޔަ އަހަރުގެ "ހައިދަރް" ގެ ބޮޑު ކާމިޔާބީ އަށް ފަހު ޝާހިދު މިހާރު ކުޅެމުން އަންނަނީ އަބިޝެކް ޗޯބޭގެ "އުޅުތާ ޕަންޖާބް" އެވެ.
އޭނާގެ ކުރިއަށް ހުރި ފިލްމުތަކުގެ ތެރޭގައި އާލިއާ ބަޓް އާ އެކު ކުޅޭ "ޝާންދާރް" އަދި ކިރިތީ ސެނަން އާ އެކު ކުޅޭ "ފަރްޒީ" ހިމެނެ އެވެ.