ހުކުރު ދުވަހު މާލެ އަސް ބޯކޮށް ވާރޭ ވެހި ފެންބޮޑުވެ ގެތަކަށް ފެން ވަދެ ލިބުނު ގެއްލުންތަކާ ގުޅޭ އެސެސްމެންޓް މިއަދު ހެދުމަށް ހަމަޖެހިފައިވާ ކަމަށް ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ބުނެފިއެވެ.
އެތަނުން ސޯޝަލް މީޑިއާގައި ރޭ އާންމުކުރި ޕޯސްޓެއްގައި ބުނީ ގެއްލުންވި 40 ގެއެއްގެ އެސެސްމަންޓް ނިންމައި، އިތުރު 18 ގެއެއްގެ އެސެސްމެންޓް މިއަދު ހަދާނެ ކަމަށެވެ. ނަމަވެސް ގެއްލުން ލިބުނު 75 ގޭގެ ތެރެއިން، 18 ގެއަކުން އެސެސްމަންޓް ހަދަން ބޭނުން ނޫން ކަމަށް ބުނެފައިވާ ކަމަށް އެންޑީއެމްއޭ އިން ބުންޏެވެ.
މާލޭގައި ފެންބޮޑުވުމުގެ ސަބަބުން އެހީތެރިކަމަށް އެދިފައިވާ 132 ގެއަކަށް އެހީތެރިކަން ފޯރުކޮށްދީ ފެންވަނުން ކުޑަކުރުމަށް 91 ގެއެއްގައި ވެލި ބަސްތާ ވެސް ޖަހައި ދީފައިވެ އެވެ.
އެންޑީއެމްއޭއިން ބުނީ ވިއްސާރައިގެ ސަބަބުން 144 ގެއަކުން ގުޅައި އެހީތެރިކަމަށް އެދުނު ކަމަށެވެ. އެގޮތުން ވިއްސާރައިގެ ސަބަބުން އަށް ގެއެއްގެ 57 މީހުންނަށް ވަގުތީ ހިޔާވަހިކަން ފޯރުކޮށްދީފައިވާ ކަމަށް ވެސް އެންޑީއެމްއޭއިން ވަނީ ބުންޏެވެ.