މާޗް މަހު ބާއްވަން ހަމަޖެހިފައިވާ ރައްޔިތުންގެ މަޖިލިސް އިންތިހާބުގައި 700 ވޯޓްފޮށި ބަހައްޓާނެ ކަމަށް އިލެކްޝަން ކޮމިޝަން (އީސީ) އިން ބުނެފި އެވެ.
އެ ކޮމިޝަނުން ބުނެފައި ވަނީ މިދިޔަ އަހަރު ބޭއްވި ރިޔާސީ އިންތިހާބުގައި ބެހެއްޓި ވޯޓްފޮށިތަކަށް ވުރެ އިތުރަށް މަޖިލިސް އިންތިހާބުގައި ވޯޓްފޮށި ބަހައްޓަން ނިންމީ އިންތިހާބު ބާއްވަން އޮތީ ރޯދަ މަހަށްވުން ވޯޓްލުން ވީހާ ވެސް ފަސޭހަކޮށް، އަވަސްކުރުމުގެ ގޮތުން ކަމަށެވެ. އީސީން ފާހަގަކޮށްފައިވާ ގޮތުގައި ވޯޓްފޮށިތަކުގެ އަދަދު ގިނަކޮށް، ކޮންމެ ފޮއްޓަކަށް ވޯޓްލާ މީހުންގެ އަދަދު މަދުކުރުމުން އިންތިހާބުގެ ކަންކަން އަވަސްވެގެން ދާނެ އެވެ. އެގޮތުން ކޮންމެ ފޮއްޓަކަށް ރަޖިސްޓްރީކުރަން ނިންމާފައި ވަނީ 500-600 އާ ދެމެދުގެ މީހުން ކަމަށް ވެސް އީސީން ބުންޏެވެ.
ކޮމިޝަނުން ބުނީ މަޖިލިސް އިންތިހާބުގައި ރާއްޖޭން ބޭރުގައި ވޯޓު ފޮށި ބަހައްޓާނީ ދިވެހި އެމްބަސީއެއް ނުވަތަ ކޮންސިއުލޭޓު އޮފީހެއް ހުންނަ، އަދި މަދުވެގެން 150 މީހުން ރެޖިސްޓްރީކުރާ ގައުމުތަކުގައި ކަމަށެވެ. މީގެ އިތުރުން މަދުވެގެން 30 މީހުން ރެޖިސްޓްރީކުރާ ރިސޯޓުތަކާއި ސިނާއީ ރަށްތަކާއި ހަދަމުން އަންނަ ރަށްތަކުގައި ވެސް ވޯޓު ފޮށި ބަހައްޓާނެ އެވެ.
މަޖިލީހުގެ 20 ވަނަ ދައުރަކަށް މެންބަރުން އިންތިހާބު ކުރަން ބާއްވާ އިންތިހާބު އޮންނާނީ މާޗް މަހުގެ 17 ގަ އެވެ.
އީސީން ނިންމާފައި ވަނީ އިންތިހާބުގައި ވާދަކުރަން ބޭނުންވާ މީހުންނަށް އެ ފުރުސަަތު މި މަހުގެ 30 ގައި ހުޅުވައިލުމަށެވެ. މި އިންތިހާބުގައި 93 ދާއިރާއަކަށް މެންބަރުން އިންތިހާބު ކުރާނެ އެވެ.