މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގް ކޮމްޕެނީ ލިމިޓެޑް އެމްޓީސީސީ އަށް ނުތަކާ ވަރަށް މަސައްކަތް ހަވާލުވެ މަސައްކަތް ކުރިއަށް ނުގެންދެވޭނީ މިފަދަ އެހެން ކުންފުންޏެއް އުފައްދަވަން ސަރުކާރުން ނިންމަވައިފިއެވެ.
މިއަދު ވަޒީރުންގެ މަޖިލީހަށް ސަރުކާރު ހިއްސަވާ ކުންފުނިތަކާއި ގުޅޭގޮތުން ހުށަހެޅި ކަރުދާހުގައި، ކުންފުނިތައް ހަރުދަނާ ކުރުމަށް ގޮތްތަކެއް ހަމަޖެއްސުމަށް ވަނީ ނިންމިފައެވެ. މީގެ ތެރެއިން އެމްޓީސީސީ އާއި ހަވާލު ކުރެވިފައިވާ ބައެއް މަސައްކަތްތައް މަޑު ޖެހިފައި ހުރުމުން އިންފްރާސްޓްރަކްޗަރ މަސައްކަތް ކުރުމަށް އައު ކުންފުންޏެއް އުފައްދައިގެން މަސައްކަތް ކުރުމަށް ވަނީ ނިންމިފައެވެ.
މިކަމާއި ގުޅޭގޮތުން ރައީސް އޮފީހުގެ ޕްރިންސިޕަލް ސެކްރެޓަރީ ޓު ޕަބްލިކް ޕޮލިސީ އަބްދުﷲ ނާޒިމް ނޫސްވެރިންނަށް ވިދާޅުވީ، މި ކުންފުނި އުފައްދަނީ އެމްޓީސީސީގެ ޕާފޯމެންސް ދަށްވެގެން ނޫން ކަމަށެވެ. ނަމަވެސް ކޮންމެ ކުންފުންޏަކަށްވެސް ކުރެވޭނީ ވަކި ވަރަކަށް މަސައްކަތް ކަން ފާހަގަ ކުރައްވާ އެގޮތަށް އުފެއްދޭ ކުންފުންޏެއް ކަމަށް ވިދާޅުވިއެވެ.
" މި ނުކުތާއަކީ އެމްޓީސީސީއަށް ޕާފޯމް ނުކުރެވުމެއް ނޫން. އިންތިހާއަށް ކުންފުންޏަކަށް ނުތަކާ ވަރަށް މަސައްކަތްތައް ހުރުން….އެމްޓީސީސީގައި އެބަހުއްޓޭ އިންތިހާއަށް ގިނަ މަސައްކަތްތައް އެއް ކުންފުންޏަކަށް ހޭންޑްލް ކުރެވޭ ވަރަށް ވުރެ ގިނަ މަސައްކަތްތައް. އެކަމަށް ހައްލެއް ހޯދުން. އޭގެ މާނައަކީ ބާރު ސްޕީޑުގައި ރައްޔިތުންނަށް މަސައްކަތްތައް ޑެލިވަރ ކުރުން " ނާޒިމް ވިދާޅުވިއެވެ.
މި ބައްދަލުވުމުގައި ނާޒިމް އެހެން ވިދާޅުވިއިރު، އެމްޓީސީސީން މިވަގުތު މަޑު ޖެހި ކުރިއަށް ނުގޮސް ހުރީ ކިތައް މަޝްރޫޢޫ ކަމަށް ސާފުކޮށް ދީފައި ނުވެއެވެ.
އެމްޓީސީސީ އަކީ ސަރުކާރު ކުންފުނިތަކުގެ ތެރެއިންވެސް އެންމެ ގިނަ މަސައްކަތް ސަރުކާރުން ހަވާލު ކުރާ އަދި އެންމެ ގިނަ މަސައްކަތް މިހާތަނަށް ނިންމާފައިވާ ކުންފުންޏެވެ. އެގޮތުން ބަނދަރު ހެދުމާއި، ގޮނޑުދޮށް ހިމާޔަތް ކުރުމާއި މަގު ހެދުމުގެ އިތުރުން އެއާޕޯޓުތައް ތަރައްޤީކުރުމުގެ މަސައްކަތް ވަނީ ކޮށްފައެވެ. މީގެ އިތުރުން ރާއްޖޭގެ ގިނަ ރައްތަކުގެ ބިން ހިއްކުމުގެ މަސައްކަތްވެސް މިދިޔަ އަހަރުތަކުގެ ތެރޭގައި ވަނީ ކޮށްފައެވެ.
މިދިޔަ ސަރުކާރުން ރިޔާސީ އިންތިހާބުގެ ތެރޭ ބުނެފައިވަނީ އެމްޓީސީސީގެ ކެޕޭސިޓީ އެއްފަހަރާ 20 ޕްރޮޖެކްޓު ހިންގޭ ކުންފުންޏަކުން މިހާރު 120 ޕްރޮޖެކްޓް ހިންގޭ ކުންފުންޏަކަށް ބަދަލުވެފައިވާ ކަމަށެވެ.