ކުރިން ވެސް ބެލެވުނު ގޮތަށް މައިކްރޯސޮފްޓްގެ އާ އޮޕަރޭޓިން ސިސްޓަމް (އޯއެސް) ވިންޑޯޒް 10 ގައި އަނެއްކާވެސް "މެނިއު" އައިޓަމްސް ހިމަނައިފި އެވެ.
މައިކްރޯސޮފްޓުގެ އޯއެސްތަކުގެ ތެރެއިން ވިންޑޯސް 8 (އޭގެ ކުރީގެ އޯއެސް) ފިޔަވައި އެހެން ހުރިހާ އޯއެސްއެއްގައި ވެސް މެނިއު ފަންކްޝަން ހުރެ އެވެ.
ޢާއްމު ގޮތެއްގައި ސްކްރީނުގެ ވާތްފަރާތު ތިރީގައި އިންނަ ބަޓަނަކަށް ކްލިކްކޮށްލުމުން، އަމިއްލަ އަށް އޮގަނައިޒް ކުރެވިފައިވާ ޝޯޓްކަޓްސް ނޫނީ ޕްރޮގްރާމްތަކަށް ފަސޭހައިން ވަދެވެ އެވެ.
ނަމަވެސް ވިންޑޯސް 8 ގައި މި ފީޗާ ހުރީ ޓައިލްސް ނޫނީ ގޮޅިތަކެއްގެ ސިފައިގަ އެވެ. އެއީ ޢާއްމުކޮށް ސްމާރޓް ފޯނުތަކުގައި ބޭނުންކުރާ ސްޓައިލާއި އެއްގޮތް ސްޓައިލެކެވެ.
އާ އޯއެސްގައި މެނިއު ފީޗާރ ހުންނަނީ ވިންޑޯޒް 8 އާއި ދާދި އެއްގޮތަކަށެވެ. ނަމަވެސް، ޓައިލްސްތަކުގެ ގޮތުގައި ވެސް ބޭނުން ކުރެވޭނެ ގޮތް ވަނީ ކުރިއަށް ވުރެ ފަސޭހަ ގޮތަކަށް އަތުރައިފަ އެވެ.
ވިންޑޯޒް 10 ގައި ފާހަގަ ކުރެވޭ އެހެން ފީޗާތަކުގެ ތެރޭގައި، މަލްޓި ޓަސްކް ވިއު، އަދި އެހެން ޕްލެޓްފޯމްތަކުގެ ޕްރޮގްރާމްތައް ސަޕޯޓް ކުރާ މިންވަރު ވަނީ ވަރަށް ބޮޑަށް އިތުރު ކުރެވިފަ އެވެ.
ވިންޑޯސްގެ އެންމެ ފަހުގެ ވާޝަންގެ ޕްރިވިއު މިހާރު ވަނީ މައިކްރޯސޮފްޓްގެ ވެބްސައިޓް މެދުވެރިކޮށް ހިލޭ ޢާއްމުންނަށް ދޫކޮށްލައިފަ އެވެ.