ރާއްޖެ އަށް އެންމެ ގިނަ ޓޫރިސްޓުން އަންނަ ގައުމަކަށް ޗައިނާ ހަދަން ސަރުކާރުން އަމާޒު ހިފާފައިވާ އިރު، އެ ގައުމު މިހާރު ހިމެނެނީ ހަ ވަނައިގައި ކަމަށް ޓޫރިޒަމް މިނިސްޓްރީން ބުނެފި އެވެ.
އެ މިނިސްޓްރީން އާންމުކުރި އެންމެ ފަހުގެ ތަފާސްހިސާބުތައް ދައްކާ ގޮތުން މި މަހުގެ 13 އާ ހަމައަށް ޗައިނާ އިން ރާއްޖެ އަށް 4،288 ޓޫރިސްޓުން އައިސްފައިވެ އެވެ. އެއީ މި އަހަރު ފެށުނު ފަހުން އެންމެ ގިނަ ޓޫރިސްޓުން އަންނަ 10 ގައުމުގެ ލިސްޓްގެ ހަ ވަނަ އެވެ.
ރައީސް ޑރ. މުހައްމަދު މުއިއްޒު ޗައިނާ އަށް ދާދި ފަހުން ކުރެއްވި ދަތުރުގައި ވަނީ ރާއްޖޭގެ އެއް ވަނަ މާކެޓަކަށް އެ ގައުމު ހަދައި ދޭން ވެސް އެދިވަޑައިގެންފަ އެވެ. އެކަމާ ގުޅުން ހުރި އެކި މަސައްކަތްތައް ވެސް މިހާރު ކުރަމުން އަންނަ އިރު، އަންނަ މަހުގެ ތެރޭގައި ބެއިޖިން އިން ރާއްޖެ އަށް އިތުރު އެއާލައިނަކުން ސީދާ ދަތުރުތައް ފަށަން ވެސް ވަނީ ނިންމައިފަ އެވެ. އެއީ ޝިއަމެން އެއާލައިންސެވެ.
ޗައިނާ އަކީ މިދިޔަ އަހަރު ތިން ވަނަ އެންމެ ގިނަ ޓޫރިސްޓުން އައި ގައުމެވެ އަދި ކޮވިޑްގެ ކުރިން އެ ގައުމަކީ ރާއްޖޭގެ އެއްވަނަ މާކެޓެވެ. މިދިޔަ އަހަރު ޗައިނާ ގަދަ 10 އަށް އަރައި މަޑުމަޑުން ކުރިއަށް ޖެހެމުން ގޮސް އަހަރު ނިންމައިލީ ގަދަ ތިނެކާ އެކީގައި ކަމަށްވާތީ މި އަހަރު ވެސް މި ޓްރެންޑް ދެމިގެންދާނެ ކަމަށް ބެލެވެ އެވެ.
ރާއްޖޭގެ މިހާރު ޓޮޕް 10 މާކެޓަށް ބަލާ އިރު، މި މަހުގެ 13 އާ ހަމައަށް އައި 10،203. ޓޫރިސްޓުންނާ އެކީ ރަޝިއާ އޮތީ އެއް ވަނައިގަ އެވެ. އެ ގައުމަކީ މިދިޔަ އަހަރުގެ ވެސް ދެވަނަ އެވެ. މިހާރު ދެވަނައިގައި އިޓަލީ އޮތީ 9،019 ޓޫރިސްޓުންނާ އެކީގަ އެވެ. މިދިޔަ އަހަރުގެ އެއްވަނަ އިންޑިއާ ތިން ވަނައިގައި އޮތީ 6،269 ޓޫރިސްޓުންނާ އެކީގަ އެވެ.
މި ލިސްޓްގައި ދެން ހިމެނެނީ އިނގިރޭސިވިލާތް (6،072 ޓޫރިސްޓުން)، ޖަރުމަން (4،377 ޓޫރިސްޓުން)، އެމެރިކާ (4،288 ޓޫރިސްޓުން)، ފްރާންސް (2،368 ޓޫރިސްޓުން)، ކަޒަކަސްތާން (1،921 ޓޫރިސްޓުން) އަދި ރުމޭނިއާ (1،573 ޓޫރިސްޓުން) އެވެ.
މި މަހުގެ 13 އާ ހަމައަށ ރާއްޖެ އައިސްފައި ވަނީ ޖުމްލަ 76،979 ޓޫރިސްޓުންނެވެ.
މި އަހަރު ރާއްޖެ އަށް 2 މިލިއަން ޓޫރިސްޓުން ގެނަންނަ އަމާޒު ހިފާފައިވާ އިރު، މިދިޔަ އަހަރު 1.8 މިލިއަނަށް ވުރެ ގިނަ ޓޫރިސްޓުން އަ އެވެ.