ރާއްޖޭގައި މަސައްކަތްކުރާ ބިދޭސީ ޓީޗަރުންނަށް އަހަރަކު 350 މިލިއަން ރުފިޔާ ހަރަދުވާ ކަމަށް އެޑިއުކޭޝަން މިނިސްޓަރު ޑރ. އިސްމާއީލް ޝަފީއު ވިދާޅުވެއްޖެ އެވެ.
ދައުލަތުގެ މީޑިއާ، ޕީއެސްއެމްގައި މިނިސްޓަރު ވިދާޅުވީ މިހާރު ވެސް ރާއްޖޭގައި 1،800 އެއްހާ ބިދޭސީ ޓީޗަރުން އެބަތިބި ކަމަށެވެ. އެހެންވެ މިނިސްޓަރު ވިދާޅުވީ ބިދޭސީން ޓީޗަރުން މަދުކުރުމަށްޓަކައި ރާއްޖޭގައި ޓީޗަރުން ބިނާކުރުމަކީ ސަރުކާރުގެ ވަރަށް ބޮޑު އަމާޒެއް ކަމަށާއި އެކަމަށް ހާއްސަ މަސައްކަތްތަކެއް ކުރިއަށް މިއޮތް ފަސް އަހަރުގެ ތެރޭގައި ކުރެވޭނެ ކަމަށެވެ.
އެގޮތުން ދިވެހި ޓީޗަރިން ތަމްރީނު ކުރުމުގެ ގައުމީ މަޝްރޫއެއް ފަށަން ވަނީ ނިންނައިފަ އެވެ. މިއީ ދިވެހިން ވަޒީފާ އަށް ނެރުމާއި ދެވޭ ތަޢުލީމުގެ ފެންވަރު މަތިކުރުމުގެ މަގުސަދުގައި ކުރާ ކަމެކެވެ.
"އޭގެ ސަބަބުން އަޅުގަނޑުމެންގެ އިކޮނޮމީ ތެރޭގައި ތިންސަތޭކަ މިލިއަނެއްހާ ރުފިޔާ ހިފެހެއްޓޭނެ. އޭގެ މަންފާ ދިވެހިރާއްޖެ އަށް ކުރާނެ." ޝަފީއު ވިދާޅުވި އެވެ.
މިނިސްޓަރު ވިދާޅުވީި ގޮތުގައި ރާއްޖޭގައި ޓީޗިން ދާއިރާ އަށް ނުކުންނަ މީހުން މަދުވަމުންދާ ކަމަށާއި ހާއްސަކޮށް ދިވެއްސާއި އިސްލާމް އިސްލާމް މާއްދާ ކިޔަވައިދޭ ގިނަ ކުރަން ޖެހޭ ކަމަށެވެ.
"ތަޢުލީމީ ދާއިރާއަށް ޓީޗިން ހަދަން ވަންނަ ކުދިން ވެސް މަދުވެއްޖެ،" މިނިސްޓަރު ވިދާޅުވި އެވެ. "ގައުމީ ފެންވަރުގެ ޕްރޮގްރާމެއްގެ ތެރެއިން ހާއްސަކޮށް އޯ ލެވެލްއާއި އޭލެވެލް ނިންމާ ދަރިވަރުންނަށް މި ޕްރޮގްރާމް އަމާޒުކޮށްފި ކަމުގައި ވަނީ ނަމަ އަޅުގަނޑަށް ގަބޫލު ކުރެވެނީ ޤައުމީ ފެންވަރުގެ ޕްރޮގްރާމެއްގެ ތެރެއިން ޓީޗަރުން ތަމްރީނު ކުރެވި ދިވެހިރާއްޖެއަށް ދިމާވެފައިވާ ޓީޗާސް ޝޯޓޭޖަށް ކޮންމެ ވެސް ވަރެއްގެ ހައްލު ތަކެއް ލިބިގެން ދާނެ ކަމަށް."
އެހެންވެ ސެކަންޑް ލެވެލްއާ ހަމައަށް ހަމައަށް ކިޔަވައި ދޭނެ ދިވެހި ޓީޗަރުން ބިނާ ކުރަން ފަސް އަހަރު ދުވަހުގެ ޕްލޭނެއް އޮތް ކަމަށް މިނިސްޓަރު ވިދާޅުވި އެވެ.