ގެސްޓްހައުސް ކުންފުންޏަކުން ރެކޯޑް ސާވިސް ޗާޖެއް ދީފި

ރާއްޖޭގައި ފުޅާކޮށް ގެސްޓްހައުސް ވިޔަފާރި ކުރަމުން އަންނަ ކާނި ހޮޓެލްސް އެންޑް ޓުއާސްގެ ކޮންމެ މުވައްޒަފަކަށް މިދިޔަ މަހިގެ ސާވިސް ޗާޖްގެ ގޮތުގައި 441. ޑޮލަރު ދީފި އެވެ.

މިއީ ރާއްޖޭގައި ގެސްޓްހައުސްއަކުން މުވައްޒަފުންނަށް މިހާތަނަށް އެންމެ ބޮޑު ސާވިސް ޗާޖެއް ދިން ފުރަތަމަ ފަހަރެވެ.
ކާނި ހޮޓެލްސްގެ 194 މުވައްޒަފަކަށް ސާވިސް ޗާޖްގެ ގޮތުގައި 441 ޑޮލަރު (6،800ރ.) ދިން އިރު، އެކަމަށް ޖުމްލަ 1.3 މިލިއަން ރުފިޔާ ހޭދަވި އެވެ.

ކާނި ހޮޓެލްސް އިން 2022 ގެ ޑިސެމްބަރު މަހުގެ ސާވިސް ޗާޖުގެ ގޮތުގައި 420 ޑޮލަރު (6،476ރ.) ދީފައިވެ އެވެ.
އެހެން ބައެއް ގެސްޓްހައުސްތަކާ ހިލާފަށް ކާނި ހޮޓެލްސް އިން އެ ކުންފުނީގެ މުވައްޒަފުންނަށް ކޮންމެ މަހަކު ވެސް ސާވިސް ޗާޖުދޭ އިރު، ސާވިސް ޗާޖް މުވައްޒަފުންނަށް ބަހަމުން އަންނަނީ ހަމަހަމަކަމާ އެކީގައި އެއްވެސް މުވައްޒަފެއް ތަފާތު ކުރުމެއް ނެތި އެވެ.

ކާނި ހޮޓެލްސް އިން އެންމެ ފުރަތަމަ ގެސްޓްހައުސްއެއް ހުޅުވީ 2008 ގައި ކ. މާފުށީގަ އެވެ. އެއީ "ކާނި ބީޗު" އެވެ. އޭގެ ފަހުން ކާނި ހޮޓެލްސް އިން "ކާނި ލޮޖް"، "ކާނި ވިލެޖް އެންޑް ސްޕާ"، "ކާނި ގްރޭންޑް ސީވިއު" އަދި "ކާނި ޕާމް ބީޗު" ނަމުގައި މާފުށީގައި ގެސްޓްހައުސްތަކެއް ހުޅުވައި އަންނަނީ ހިންގަމުންނެވެ.

މާފުށީގައި ކާނި ހޮޓެލްސްގެ ބެޑް ކެޕޭސިޓީ 494 އަށް އަރަ އެވެ. އެތަނުން މިހާރު ވެސް އަންނަނީ މާފުށީގައި 68 ކޮޓަރީގެ ހޮޓަލެއްގެ އިތުރުން އއ. އުކުޅަހުގައި އަޅާ 148 ކޮޓަރީގެ ސިޓީ ހޮޓަލެއް ތަރައްގީ ކުރަމުންނެވެ.

ކާނި ހޮޓެލްސް އަކީ ކޮންމެ އަހަރު ކުންފުނީގެ ހަރަދުގައި ދެ މުވައްޒަފަކު ހައްޖަށް ވެސް ފޮނިވަމުން އަންނަ ކުންފުންޏެކެވެ.

ލޯކަލް ޓޫރިޒަމްގެ ތެރެއިން ރާއްޖޭގައި މިހާރު ވަރަށް ފުޅާކޮށް ގެސްޓްހައުސްް ވިޔަފާރި އެކި ހިސާބުތަކުގައި ހިންގަމުން އަންނަ އިރު، މާފުއްޓަކީ މި ވިޔަފާރީގައި އެންމެ މަޝްހޫރު ރަށެވެ.