ރަށު ކައުންސިލްތަކާއި ސިޓީ ކައުންސިލްތަކުން ހަދާ ލޭންޑް ޔޫޒް ޕްލޭން ހުށަހެޅުމާއި އެއަށް ބަދަލު ގެނައުމުގެ ޚިދުމަތް ވަން ގަވް މެދުވެރިކޮށް ލިބޭ ގޮތް ހަމަޖައްސައިފިއެވެ.
މިއަދު މި ޚިދުމަތް ރަސްމީކޮށް ލޯންޗް ކޮށްދެއްވާފައިވަނީ މިނިސްޓްރީގެ ސްޓޭޓް މިނިސްޓަރ މުހައްމަދު ދިލްޝާން އަބްދުﷲއެވެ. ސަރުކާރުގެ އިދާރާތަކުން ދޭ ޙިދުމަތް އެއް ތަނަކުން ލިބޭ ގޮތަށް ފަރުމާކޮށްފައިވާ ވަން ގަވް ޕްލެޓްފޯމަށް ލޭންޑް ޔޫޒް ޕްލޭން ޚިދުމަތް މިއަދު ތައާރަފް ވެގެން ދިޔައިރު މިއީ މި ޕްލެޓްފޯމަށް އިތުރު ކުރެވުނު ހައުންސިން މިނިސްޓްރީގެ ފުރަތަމަ ޚިދުމަތެވެ.
އަދި މިއީ ސަރުކާރުގެ ފުރަތަމަ 14 ހަފްތާ މަގުޗާޓުގައިވާ، ލޭންޑް ޔޫސް ޕްލޭން ފާސްކުރުމުގެ ޚިދުމަތް ފަސޭހަކަމާއެކު ފޯރުކޮށްދިނުމުގެ ދަށުން ކުރެވުނު މަސައްކަތެއް ކަމަށް ހައުންސިން މިނިސްޓްރީން ބުނެއެވެ.
ސަރުކާރުގެ ފުރަތަމަ 14 ހަފްތާ މަގުޗާޓުގައިވާ، ލޭންޑް ޔޫސް ޕްލޭން ފާސްކުރުމުގެ ޚިދުމަތް ފަސޭހަކަމާއެކު ފޯރުކޮށްދިނުމަށް "ވަންގަވް" ޕްލެޓްފޯމް މެދުވެރިކޮށް ލޭންޑް ޔޫސް ޕްލޭން ފާސްކުރުމަށް އަދި ބަދަލުގެނައުމަށް ހުށަހެޅުމަށް ހަމަޖައްސައިފިއެވެ. pic.twitter.com/yD6qLvvCr0
— Ministry of Housing, Land and Urban Development (@MHLUDmv) January 16, 2024
ކައުންސިލްތަކުން ލޭންޑް ޔޫޒް ޕްލޭން ހެދުމަށް ފަހު ފޮނުވަން ޖެހެނީ މިނިސްޓްރީ އޮފް ހައުންސިންގް ލޭންޑް އެންޑް އާބަން ޑިވެލޮޕްމެންޓަށެވެ. އެ މިނިސްޓްރީން ލޭންޑް ޔޫޒް ޕްލޭންތައް ދިރާސާ ކުރުމަށް ފަހު މައްސަލައެއް ފާހަގަވާނެ ބަދަލު ގެނައުމަށް އަންގާނެއެވެ. މިގޮތަށް ރިވިޝަންތައް ގެނައުމާއި އެޕްރޫވަލްއަށް ހުށަހެޅުމުގައި ކައުންސިލްތަކަށް ބައެއް ފަހަރު ދަތިތަކާއި ކުރިމަތަލާން ޖެހޭ ކަމަށް ކައުންސިލްތަކުން ފާހަގަ ކުރެއެވެ. މީގެ ސަބަބުން ޕްލޭންތައް އެޕްރޫވް ނުވެ ކައުންސިލްތަކަށް އެ ރަށެށްގެ ނޫނީ ސިޓީއެއްގެ ބިން ބޭނުން ނުކުރެވި ދިގުލައިގެން ދެއެވެ.
ވަންގަވް އިން މިކަމާއި ގުޅޭގޮތުން ބުނެފައިވަނީ މިއަދުން ފެށިގެން ކައުންސިލްތަކަށް މި ޚިދުމަތް ވަން ގަވް މެދުވެރިކޮށް ލިބޭނެ ކަމަށެވެ. އަދި މިއަހަރު ބާކީ އޮތް ދުވަސްތަކުގައި އެ މިނިސްޓްރީގެ އިތުރު ޚިދުމަތްތަށް ވެސް ވަންގަވް ޕްލެޓްފޯމް މެދުވެރިކޮށް އާންމު ރައްޔިތުންނަށް ލިބިގެން ދާނެ ކަމަށް ވަންގަވް އިން ބުނެއެވެ.
ވަންގަވް ސަރުކާރުގެ އިދާރާތަކުން ދޭ ޚިދުމަތްތައް އަވަހަށް ރައްޔިތުންނަށް ފަސޭހަކަމާއި އެކު ލިބޭނެ އިންތިޒާމެއް ހަމަޖެއްސުމަށް އުފައްދާފައިވާ ޕޯޓަލްއެކެވެ. މި ޕޯޓަލްގެ ތެރެއިން މިވަގުތުވެސް ހައުސިންގް މިނިސްޓްރީ ހިމެނޭހެން 5 ވުޒާރާއެއްގެ ޚިދުމަތްތައް ލިބެއެވެ.