ރާއްޖޭގައި ވާޓިކަލް ފާމިން ޕައިލެޓް މަޝްރޫޢެއް ހިންގަން މިނިސްޓްރީ އޮފް އެގްރިކަލްޗަރ އާއި އަމިއްލަ ކުންފުންޏަކާއި ދެމެދު އެއްބަސްވުމެއްގައި ސޮއިކޮށްފިއެވެ.
ރާޢްޖޭގައި ވާރޓިކަލް ފާމިން ފުޅާދާއިރާއެއްގައި ކުރެވިދާނެތޯ ބެލުމަށްޓަކައި ޕައިލެޓް ޕްރޮޖެކްޓެއް ހިންގުމުގެ އެއްބަސްވުން ގާއިމްކޮށްފައިވަނީ މިނިސްޓްރީ އޮފް އެގްރިކަލްޗާރ އެންޑް އެނިމަލް ވެލްފެއާއި ވީސީ ގްރޫޕް ޕްރައިވެޓް ލިމިޓެޑާއި ދެމެދުއެވެ. ވާޓިކަލް ފާމިން ނުވަތަ ބިމުން މައްޗަށް ކުޑަ ޖާގައެއްގައި ދަނޑުވެރިކަން ކުރުމުގެ މިމަޝްރޫޢު އަކީ ރައީސް ޑރ. މުއިއްޒުގެ ހަފްތާ 14 މަގުޗާޓުގައި ހިމެނިގެން ކުރިއަށް ގެންދާ މުހިންމު މަޝްރޫޢެކެވެ.
މިއެއްބަސްވުމުގައި މިނިސްޓްރީގެ ފަރާތުން ސޮއިކޮށްފައި ވަނީ ފައިނޭންސް އެގްޒެކެޓިވް ފާތިމަތު ޝާއިއާއެވެ. އަދި ވީސީ ގްރޫޕްގެ ފަރާތުން ސޮއިކޮށްފައި ވަނީ އެކުންފުނީގެ މެނޭޖިންގ ޑިރެކްޓަރ އިސްމާއިލް ރަޝީދެވެ.
An agreement has been signed by Ministry and @Agrotechmv to commence the Vertical Farming Pilot project as part of the #Hafthaa14 plan
The project is aimed to allow farmers to grow large scales of produce in a small land area .@MariyamVishama @Hussain_jfm @fzuhuraa @AhmadhMV pic.twitter.com/Ezdh4KVgXA— Ministry of Agriculture and Animal Welfare (@MAAWmv) January 16, 2024
މިމަޝްރޫގެ ދަށުން ހަނިމާދޫ އެގްރިކަލްޗާރ ސެންޓަރުގައި ތިން ވައްތަރެއްގެ ވާރޓިކަލް ހައިޑްރޮޕޯނިކްސް ސެޓަޕެއް ޤާއިމް ކުރާނެއެވެ. އޭގެތެރޭގައި ހިމެނެނީ މިހާރުވެސް ރާއްޖޭގެ ދަނޑުވެރިންނަށް ތާރަފްކޮށްދީފައިވާ ނިއުޓްރިއެންޓް ފިލްމު ޓެކްނިކް ބޭނުންކޮށްގެން ވާޓިކަލް އޭ ފްރޭމް ސްޓްރަކްޗާރގައި ގަސް ހައްދާ ނިޒާމާއި، ޕައިން އެޕަލް ޓަވަރ ސިސްޓަމް އަދި އޭރޯޕޯނިކްސް ޓަވާރ ނިޒާމެވެ.
މި ތިން ސެޓަޕް ޤާއިމްކޮށް މި އެއްބަސްވުމުގެ ދަށުން ޓެސްޓު ކުރެވޭނެއެވެ. މި ތިން ނިޒާމުގައިވެސް އެންމެ ފުރަތަމަ ޓެސްޓުކުރުމަށް ހަމަޖެހިފައި ވަނީ އެކި ބާވަތުގެ ފަތާއި ތަރުކާރީ އާއި ތަފާތު ހާބްސްގެ ބާވަތްތަކެވެ.
މިމަޝްރޫގެ ދަށުން ހަނިމާދޫ އެގްރިކަލްޗާރ ސެންޓަރުގައި މަސައްކަތްކުރާ މިނިސްޓްރީގެ ފަންނީ މުވައްޒަފުންގެ ޓީމުން އެއްކުރާ މައުލޫމާތުގެ އަލީގައި ރާއްޖެއަށް އެންމެ އެކަށީގެންވާ ވާރޓިކަލް ސިސްޓަމްތައް ދެނެގަންނާނެއެވެ. އަދި ނިޒާމު ދަނޑުވެރިންނަށް ތައާރަފްކޮށްދީ އެކަން ކުރެވޭނެ ގޮތް މިނިސްޓްރީގެ ކުރިއަށް ހުރި މަޝްރޫޢުތަކުގެ ތެރެއިން ކުރިއަށް ގެންދަން ވަނީ ރޭވިފައެވެ.