މިހާރު ވެރިކަންކުރާ ޕާޓީ، ޕީއެންސީ އަށް ބަދަލުވުމަށް ބޮޑެތި އަދަދުން ރިޝްވަތު ހުށައެޅި ކަމަށް ރައްޔިތުން މަޖިލީހުގެ ދާންދޫ ދާއިރާގެ މެމްބަރު ޔައުގޫބް ވިދާޅުވެއްޖެ އެވެ.
އެމްޑިޕީ އަށް ނިސްބަތްވާ މެންބަރު ޓީވީ ޕްރޮގްރާމެއްގައި ވިދާޅުވީ ޕީއެންސީއާ ގުޅެން ދައުވަތު ދިނީ ގައުމުގެ ހައްގުގައި ކަމަށް ބުނެ ކަމަށެވެ.
"އަޅުގަނޑަށް އައި ހުށަހެޅުން. އެ ހުށަހެޅުމަކީ ގައުމަށްޓަކައި ޕީއެންސީ އަށް ބަދަލުވުމަށް އައި ހުށަހެޅުންތަކެއް ނޫން. ފައިސާގެ ހުށަހެޅުންތައް އައީ،" ޔައުގޫބް ވިދާޅުވި އެވެ. "ފައިސާ އަކީ ރިޝްވަތު. ރިޝްވަތުގެ ހުށަހެޅުންތައް އައީ. އަޅުގަނޑު ދެންނެވިން އަޅުގަނޑަކީ އެގޮތަށް ގެންދެވޭނެ މީހެއް ނޫނޭ."
ދާދި ފަހުން އެމްޑީޕީގެ 14 މެންބަރަކު ޕީއެންސީއާ ގުޅިވަޑައިގެންނެވި އެވެ. އޭގެ ތެރެއިން 13 މެންބަރަކު ޕާޓީ އަށް ސޮއިކުރެއްވީ މިދިޔަ މަހުގެ 28 ގައި ދަރުބާރުގައި ބޭއްވި ޖަލްސާއެއްގަ އެވެ. އަދި މި މަހުގެ 6 ގައި އެމްޑީޕީގެ އިތުރު މެންބަރަކު ޕީއެންސީއާ ގުޅިވަޑައިގަތެވެ.
އެމްޑީޕީ ދޫކޮށް ޕީއެންސީއާ ގުޅުނު މެމްބަރުން:
* މަރަދޫ ދާއިރާ މެމްބަރު އިބްރާހީމް ޝަރީފު (މަވޯޓާ)
* ފޭދޫ ދާއިރާ މެމްބަރު މުހައްމަދު ނިހާދު
* މައްޗަންގޯޅި ދެކުނު ދާއިރު މެމްބަރު އަހުމަދު ހައިތަމް
* އިސްދޫ ދާއިރާ މެމްބަރު އަލީ ހަމީދު
* ކަނޑިތީމު ދާއިރާ މެމްބަރު އަބްދުﷲ ޝަހީމް އަބްދުލް ހަކީމް
* ކުރެންދޫ ދާއިރާ މެމްބަރު އަބްދުލް ގަނީ އަބްދުލް ހަކީމް
* މަތިވެރި ދާއިރާ މެމްބަރު ހަސަން ޒަރީރު
* މުލަކު ދާއިރާ މެމްބަރު އިބްރާހީމް ނަސީމް
* ނިލަންދޫ ދާއިރާ މެމްބަރު އަބްދުލް މުހުސިން ހަމީދު
* މާފަންނު ދެކުނު ދާއިރާ މެމްބަރު އާދަމް އަލީ
* ކޮމަންޑޫ ދާއިރާ މެމްބަރު މުހައްމަދު ރާޝިދު
* ތޮއްޑޫ ދާއިރާ މެމްބަރު ހަސަން ޝިޔާން
* ގުރައިދޫ ދާއިރާ މެމްބަރު އިބްރާހީމް ޝާޒް
* އިނގުރައިދީ ދާއިރާގެ މެމްބަރު ހަސަން އަހުމަދު (ހަސަންޓޭ)
އަޑު އަރާފައިވާ ގޮތުން ޕީއެންސީން މެންބަރުން ގެންދެވީ ކޮންމެ މެންބަރަކަށް ހަތަރު މިލިއަން ރުފިޔާގެ މަގުންނެވެ. އެކަމަކު ފައިސާ އަށް ޕާޓީ ބަދަލުކުރެއްވި ވާހަކަ އަށް މެންބަރުން އިންކާރު ކުރައްވަ އެވެ.